Ońtústiktiń kelinderi sálem salyp jarysty
ShYMKENT. QazAqparat - Ońtústik Qazaqstan oblysynda «Qazaqtyń kelinderi-aı!» atty baıqaý ótti. Jastar úshin taǵylymy mol óner saıysyna aýyl-aımaqtan 11 kelin qatysyp, baǵyn synady, dep habarlaıdy QazAqparat tilshisi.
Sozaq aýdandyq áıelder keńesiniń uıymdastyrýymen ótken baıqaýdyń talaptary ońaı bola qoıǵan joq. Qaıyn sińlilerimen birge kelgen aýyldyń kelinderi baryn salyp, óner kórsetti. Baıqaýda talapkerler qazaqtyń umyt bola bastaǵan ulttyq taǵam túrlerin daıyndady. Qol óneri men ismerligin kórsetti. Sonymen birge shyǵarmashylyq bilimin tanytý boıynsha synǵa tústi. Bárinen de ata-enesine sálem salý, qaıyn sińlilerine at qoıý sekildi talaptar qıynǵa soqty. Halqymyzdyń salt-joralǵylaryna saı keletin dástúrdi kelinder barynsha kórsetýge tyrysty.
Sondaı-aq saıysta quraq kórpe jasaý, urshyq ıirý syndy ulttyq qolónerimiz dáripteldi. Óte tartysty ótken saıysta aýyl kelinderi qazaq analaryna tán ıbalylyq pen ádeptilikti, ismerlik pen eptilikti joǵary dárejede kórsetip, kópshiliktiń rızashylyǵyna bólendi.
Іs-shara sońynda baıqaýǵa qatysqan barlyq úmitker alǵys hatpen marapattaldy. Qazylar alqasynyń sheshimi boıynsha bas júldege Sholaqqorǵan aýylyndaǵy «Aıshýaq» balalar baqshasynyń tárbıeshisi Aqbota Romanqulova ıe boldy.
