Ońtústiktiń kedenshileri 42,5 kelige jýyq geroın tárkiledi
ASTANA. 24 jeltoqsan. QazAqparat - Keden odaǵynyń ońtústik shekarasynda narkotrafıktiń jolyn kesýdi kúsheıtý sharalary nátıjesinde asa úlken kólemdegi esirtki zattary tárkilendi.
Atap aıtqanda, 2012 jyldyń 22 jeltoqsanynda tańerteńgi saǵat 8 shamasynda «Qordaı» kedeni qyzmetkerleri kedendik tekserý barysynda 42479,0 gramm geroın, 1983,0 gramm gashısh esirtki zattaryn tárkilep aldy. Bul týraly Kedendik baqylaý komıtetiniń baspasóz qyzmetinen habarlandy.
Qyrǵyzstan Qazaqstanǵa kele jatqan Qyrǵyzstan azamatynyń «Ford-Fokýs» markaly avtokólik quraly «Qordaı» kedeniniń bas mamany E. Baınııazovpen tekserý alańyna jiberilgen bolatyn. Kedenshilerdiń «Sera» atty qyzmettik-izdestirý ıtiniń kómegimen muqııat tekserý barysynda avtokóliktiń artqy bamperinen skochpen oralǵan brıket tabyldy. Odan keıin kólik ınspektsııalyq-tekserý keshenine jóneltildi.
Toqtala ketetin jaıt, osynaý zamanaýı skanerleýshi qondyrǵy kómegimen avtokólik quralynyń jeti jerindegi túrli agregattarynyń astynan bógde zattar tabyldy. QR UQK shekara qyzmetiniń áskerı qyzmetkerleri men Jambyl oblysy prokýratýra qyzmetkerleriniń qatysýymen avtokólik quralyn jiti tekserý kezinde erekshe ıisi bar, kesek túrindegi 43 brıket zaty tabyldy. Qupııa saqtalǵan jerlerden tabylǵan brıketterdiń jalpy sany 44 danany qurady. 2012 jylǵy 22 jeltoqsanda jasalǵan sot-hımııalyq saraptamanyń qorytyndysy boıynsha, tárkilengen zattar 42479,0 gramm salmaqtaǵy geroın, 1983,0 gramm salmaqtaǵy gashısh esirtki zattary ekendigi anyqtaldy.
Atalǵan faktiler boıynsha QR Qylmystyq Kodeksiniń 250-babynyń 4-bóliginde jáne 259-babynyń 3-tarmaǵy «V» tarmaqshalarynda aıqyndalǵan qylmystyq belgileri boıynsha qylmystyq ister qozǵaldy.
Keden organdarynyń qyzmetindegi bul jaıt alǵash ret oryn alyp otyrǵan joq. Masylǵa, aǵymdaǵy jyldyń 4 qarashasynda «Qordaı» kedeni «Qarasý» keden beketiniń qyzmetkerlerimen jalpy salmaǵy 181 keli 404 gramm 400 mılıgramm apıyn esirtki zaty tárkilengen. Ol da ınspektsııalyq -tekserý kesheni kómegimen tekserý kezinde anyqtalǵan bolatyn.
