Ońtústiktiń qasıetti oryndary týraly kitap úsh tilde shyqty
TÚRKІSTAN. QazAqparat - Túrkistanda «Ońtústik Qazaqstan oblysynyń tarıhı oryndary men kıeli jerleri» men «Ońtústiktiń qasıetti oryndary: ańyz-ápsanalar» atty qos kitaptary jaryq kórdi. Kitaptardyń tusaýkeserine ardagerler men zııaly qaýym ókilderi, oqyrmandar men ǵalymdar, jýrnalıster jáne ózge de azamattar qatysty, dep habarlaıdy QazAqparat tilshisi.
Túrkistan oblystyq ishki saıasat basqarmasy uıymdastyrǵan mádenı sharany Túrkistan oblysynyń ákimi Janseıit Túımebaev saltanatty túrde ashyp, «Rýhanı jańǵyrý» baǵdarlamasy aıasynda jaryq kórgen týyndylardyń mańyzdylyǵyna toqtaldy. Qos kitaptyń qundylyǵy týraly aıtyp ótti.
«Oblysymyzda 2 qundy kitap jaryq kórip, tusaýy kesilgeli tur. Bul eki kitap oqyrman úshin óte qajet dúnıeler. Biz óz tarıhymyz ben týǵan ólkemizdiń san ǵasyrdan beri kele jatqan shejiresin bilý arqyly ulttyq bolmysymyzdy, ulttyq kodymyzdy saqtaı alamyz. Bul kitaptar rýhanı jańǵyrý úshin óte mańyzdy. Qysqasy, mundaı kitaptar oqyrmanǵa jetip, rýhanı qazynadan árbir azamat sýsyndaýy tıis», - dedi Janseıit Túımebaev.
Úsh tilde shyǵarylǵan «Ońtústik Qazaqstan oblysynyń tarıhı oryndary men kıeli jerleri» atty kitap-fotoalbomda Túrkistan oblysynyń tarıhı oryndary túgel kórsetilgen. Munda kıeli oryndar men eskertkishter týraly qazaq, aǵylshyn jáne orys tilderinde málimet berilip, sýrettermen kómkerilgen.
Al, «Ońtústik qasıetti oryndary: ańyz-ápsanalar» atty kitabynda Túrkistan oblysyndaǵy áýlıe-ámbıeler men el aýzyndaǵy tulǵalar týraly ańyzdar men áńgimeler jazylǵan. Bul kitapta kóne zamandardan syr shertetin ápsanalar men qyzyqty derekter mol.
Sonymen qatar, osy kúni «2017 jyl: aıshyqty oqıǵalar» atty kitap ta oqyrmanǵa jol tartty. Bul kitapta óńirdegi ótken jylǵy aıryqsha oqıǵalar qamtylǵan.
