Ońtústikten sý tasqynynan zardap shekken oblystarǵa gýmanıtarlyq kómek jóneltildi
ShYMKENT. QazAqparat - Búgin Shymkentten kóktemgi sý tasqynynan zardap shekken Qaraǵandy, Aqmola, Soltústik Qazaqstan, Qostanaı, Pavlodar, Aqtóbe jáne Shyǵys Qazaqstan oblystarynyń turǵyndaryna gýmanıtarlyq kómek jiberildi, dep habarlaıdy QazAqparat HAA tilshisi.
Aıta keteıik, oblystyq «Jastar resýrstyq ortalyǵynyń» janynan qurylǵan «Bizben birge» eriktiler mektebi ashqan arnaıy shtabqa zattaı jáne qarjylaı gýmanıtarlyq kómek qabyldandy. Sondaı-aq, ıgi iske M.Áýezov atyndaǵy OQMÝ stýdentteri de óz úlesterin qosty. Osylaısha, quny 15 mln. teńge bolatyn azyq-túlik, turmysqa qajetti zattar, kórpe-jastyq pen 200 kilem tıelgen júk kóligi jolǵa shyqty.
Eske salaıyq, sáýir aıynda Qazaqstannyń 7 óńirinde, ıaǵnı, Qaraǵandy, Aqmola, Soltústik Qazaqstan, Qostanaı, Pavlodar, Aqtóbe jáne Shyǵys Qazaqstan oblystaryndaǵy 52 eldi meken kóktemgi sý tasqynynan zardap shekken bolatyn. Saldarynan eki myńǵa jýyq úı sý astynda qalyp, 120 tasjoldy sý shaıyp ketti.
Osyǵan oraı, elimizdiń barlyq óńirinde kómek qabyldaý oryndary ashylyp, buqara jurt jumyla demeý bolýda. Kúngeılik jastar da osy mańyzdy isten shet qalmaı, qınalǵandarǵa qol ushyn sozý týraly oblys turǵyndaryna úndeý jarııalaǵan edi. Osynyń negizinde arnaıy shtab ashylyp, az ýaqyt ishinde járdem bergen azamattardan qajetti zattar men qarajat qabyldandy.
