Ońtústikten soltústikke: Túrkistan oblysy turǵyndary teriskeıdegi tirshilikti kórý úshin jolǵa shyqty
Teriskeıge attanǵan toptyń qatarynda BAQ ókilderi de bar. Olar 13 aýdandy aralap, kópshilikti jergilikti halyqtyń tynys-tirshiligimen tanystyrady.
Kósh qatysýshylaryn «AMANAT» partııasy Túrkistan oblystyq fılıalynyń tóraǵasy Altynsary Úmbetalıev, «Tauekel» uıymynyń tóraǵasy Býrahan Daqanov jáne birqatar oblystyq máslıhat depýtattary saltanatty túrde shyǵaryp saldy.
«Jalpy, teriskeıge baratyn túrkistandyqtardy jarly, kómek qajet etetin adamdar degen stereotıpten arylýymyz kerek. Bul óńir turǵyndary - kómek alýshy emes, qazaqty qutqarýshy azamattar. Soltústikke kósh - elimizdiń bekemdigi úshin óte qajet shara. Elimizdegi 3,2 mln jýyq oqýshynyń 530 myńy Túrkistan oblysynda eken. Soltústiktegi aýyldarda jabylaıyn dep turǵan mekemelerdi aman alyp qalatyn osy aımaqtyń azamattary der edim. Sondyqtan da elim-jerim degen óńir turǵyndary el irgesin bekemdeý úshin teriskeıge kóship barýy kerek», — deıdi «Tauekel» uıymynyń tóraǵasy Býrahan Daqanov.
«Qýatty óńirler – el damýynyń draıveri» jobasy aıasynda 2015 jyldan beri Túrkistan oblysynan jumys kúshi jetispeıtin soltústik óńirlerge halyqty qonystandyrý jumysy júrgizilip jatyr.
Atalǵan baǵdarlama boıynsha 2015-2022 jyldar aralyǵynda ońtústikten soltústikke 11 892 adam qonys aýdarǵan.
2022 jyldyń qorytyndysymen respýblıka boıynsha 6 587 kvota belgilense, onyń 32,3% Túrkistan oblysynyń turǵyndaryna berildi.
Bul kórsetkish aldyńǵy jyldarmen salystyrǵanda 3 ese kóp.
Al, bıyl jyl basynan beri Túrkistan oblysynan 34 otbasy, onyń ishinde 79 adam soltústikke qonys aýdarǵan.
