Ońtústikten soltústikke kóshý sýbsıdııasy 2 ese ulǵaıady

NUR-SULTAN. QazAqparat – Prezıdent Qasym-Jomart Toqaevtyń tapsyrmasy boıynsha ońtústikten soltústikke qonys aýdarýshylardyń kóshýine beriletin sýbsıdııa mólsheri 35 AEK-ten 70 AEK-ke artady, dep habarlaıdy QazAqparat tilshisi.

Bul týraly Eńbek jáne halyqtyń áleýmettik mınıstrligi QazAqparatqa bergen jaýabynda aıtylǵan.

«Jyl saıyn ınflıatsııa deńgeıine baılanysty aılyq eseptik kórsetkish mólsheri kóbeıip otyrady. AEK mólsheri ózgergen saıyn sýbsıdııalar mólsheri de ózgeredi. Máselen, baǵdarlamanyń alǵyshqy jylynda 2017 jyly turǵyn úı jaldaý úshin eń mınımaldy tólem somasy 34 myń teńgeni qurasa, 2021 jyly 43,7 myń teńgege deıin kóbeıgen», - dep jazylǵan mınıstrliktiń jaýabynda.

Vedomstvo ókilderi Prezıdent tapsyrmasy boıynsha qonys aýdarýshylarǵa kóshýge beriletin sýbsıdııa mólsherin 35 AEK-ten 70 AEK-ke deıin kóbeıtý úshin «Eńbek» baǵdarlamasyna ózgerister engizý boıynsha jumystar júrip jatqanyn aıtady.

«Atalǵan ózgeris kúshine engen soń kóshýge birjolǵy sýbsıdııa mólsheri 102,1 myń teńgeden 204,2 myń teńgege deıin kóbeıedi», - dep jazylǵan jaýapta.

Buǵan deıin habarlaǵanymyzdaı, Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» baǵdarlamasy eldegi kóshi-qonnyń teris saldosyn 15 paıyzǵa deıin qysqartqan.

Sondaı-aq, mınıstrlik mamandar «Eńbek» kóshi qandaı mamandyqtar tapshylyǵyn joıǵanyn aıtyp berdi.

Resmı derek boıynsha, jumys kúshi tapshy óńirlerge qonys aýdarǵan jastardyń 76 paıyzy jumysqa turǵan.