Ońtústikten soltústikke: Kóshi-qonnyń teris saldosy 15 paıyzǵa qysqardy

NUR-SULTAN. QazAqparat – Nátıjeli jumyspen qamtýdy jáne jappaı kásipkerlikti damytýdyń 2017 – 2021 jyldarǵa arnalǵan «Eńbek» baǵdarlamasy eldegi kóshi-qonnyń teris saldosyn 15 paıyzǵa deıin qysqartqan, dep habarlaıdy QazAqparat tilshisi.

Eńbek jáne halyqty áleýmettik qorǵaý mınıstriligi QazAqparat saýalyna bergen jaýabynda osyndaı derek keltirgen.

«Sońǵy 5 jylda (2015 jyldan bastap) elimizde halyq sany 1,2 mln adamǵa artyp, 18,6 mln adamdy qurady. Óz kezeginde osy aralyqta keıbir soltústik óńirlerde (Qaraǵandy, Qostanaı, Pavlodar, Soltústik Qazaqstan, Shyǵys Qazaqstan oblystary) halyq sany kerisinshe 66,8 myń adamǵa azaıýy baıqalady», -deıdi mınıstrlik

Vedomstvonyń jaýabyna súıensek, kóshi-qonnyń oń saldosy tek Mańǵystaý oblysy men Nur-Sultan, Almaty, Shymkent qalalarynda baıqalǵan.

«Bul másele ásirese úkimet anyqtaǵan óńirlerde erekshe ózekti bolyp tabylady. Halyqtyń tabıǵı ósiminiń tómen bolýy kóshi-qonnyń keri saldosyn jappaıdy. Eńbek memlekettik baǵdarlamasy sheńberinde iske asyrylatyn erikti óńiraralyq qonys aýdarý kóshi-qonnyń keri áserin 15 paıyzǵa deıin azaıtýǵa septigin tıgizdi», - dep jazylǵan resmı jaýapta.

Buǵan deıin habarlaǵanymyzdaı, vedomstvo sońǵy 4 jylda ońtústikten soltústikke qonys aýdarǵan otbasylarǵa qansha aqsha jumsalǵanyn málim etti.

Sondaı-aq, mınıstrlik mamandar «Eńbek» kóshi qandaı mamandyqtar tapshylyǵyn joıǵanyn aıtyp berdi.

Resmı derek boıynsha, jumys kúshi tapshy óńirlerge qonys aýdarǵan jastardyń 76 paıyzy jumysqa turǵan.