Ońtústikten soltústikke qonys aýdarýshylardy úımen qamtý mehanızmi qalaı iske asyrylady
ASTANA. QazAqparat - Elimizdiń ońtústik óńirlerinen soltústik aımaqtaryna qonys aýdarýshylarǵa turǵyn úı salý jáne satyp alý mehanızmi qalaı iske asyrylady? Bul suraqqa Eńbek jáne halyqty áleýmettik qorǵaý mınıstrligi Halyqty jumyspen qamtý jáne eńbek naryǵyn damytý departamentiniń dırektory Jeńisbek Dýlatov jaýap berdi, dep habarlaıdy QazAqparat tilshisi.
Aıta ketsek, búgingi Úkimet otyrysynda QR Eńbek jáne halyqtyq áleýmettik qorǵaý mınıstri Mádına Ábilqasymova jýyq arada eldiń ońtústik óńirlerinen soltústik aımaqtaryna qonys aýdarýshylarǵa turǵyn úı salý jáne satyp alý mehanızmi iske qosylatynyn jarııa etken edi. Mınıstrdiń aıtýynsha, bul jospardy oryndaý úshin 2019-2021 jyldary bıýdjetten 15 mlrd teńge bólinbek. Osylaısha, aldaǵy eki jylda ońtústikten soltústikke qonys aýdarǵan 3 myń adam baspanamen qamtylmaq.
Úkimet otyrysynan keıin baspasóz ortalyǵynda tilshilerdiń suraǵyna jaýap bergen Eńbek jáne halyqty áleýmettik qorǵaý mınıstrligi Halyqty jumyspen qamtý jáne eńbek naryǵyn damytý departamentiniń dırektory Jeńisbek Dýlatov atalmysh mehanızm qalaı iske asyrylatynyn aıtyp berdi.
«Baǵdarlama boıynsha bıyl myń jarym otbasy soltústikke kóshken. Biz osy baǵdarlamada jańa ádisterdi qarastyryp jatyrmyz. Birinshiden, soltústikke qonys aýdarǵan adamdardyń eń aldymen úı máselesin sheshýdi kózdedik. Baspana máselesi sheshilmese, álbette, qonys aýdarýshylardyń qyzyǵýshylyǵyn týdyrý qıynǵa túseri anyq. Mine, sol úshin kelesi jyldan bastap ár otbasyǵa jeke úı salynady. Sol úıde qonys aýdarýshylar bes jyl tursa, bes jyldan keıin olar sol úıdi óz atyna aýdaryp ala alady. ıAǵnı, keıin aı saıyn bizdiń esep boıynsha 20-25 myń teńge tólep tursa, qaryzdaryn tólep bolǵannan keıin úı tolyǵymen sol kisilerdiń atyna aýdarylady», - dedi Jeńisbek Dýlatov.
