Ońtústikten soltústikke qonys aýdarýshylar úshin 6587 kvota bólindi
«Memleket basshysynyń tapsyrmasyna sáıkes Qazaqstan Respýblıkasynyń 2022-2026 jyldarǵa arnalǵan Kóshi-qon saıasaty tujyrymdamasynyń jobasy ázirlendi», - dep atap ótedi jaýabynda Úkimet basshysynyń orynbasary.
Onyń dereginshe, tujyrymdamada kóshi-qon protsesterin retteýge baǵyttalǵan kelesi naqty is-sharalar qarastyrylǵan:
− ońtústik óńirlerden soltústikke jumys kúshin tartqan kásiporyndardyń shyǵystaryn óteý;
− oblysishilik jáne óńiraralyq qonys aýdarýdy yntalandyrý;
− túrli sebeptermen ómir súrýge qolaısyz eldi mekenderdiń turǵyndaryna kóshýge járdemdesý;
− qonys aýdarýshylarǵa aýyl sharýashylyǵymen aınalysý úshin jer ýchaskelerin berý;
− soltústik óńirlerge qonys aýdarǵan qandastarǵa azamattyq alǵannan keıin turǵyn úıge kezegin saqtaý.
«Qýatty óńirler – el damýynyń draıveri» ulttyq jobasyn iske asyrý arqyly 2026 jylǵa deıin soltústikke qonys aýdarǵan azamattardyń jumyspen qamtý deńgeıin 87 paıyzǵa deıin jetkizý kózdelgen. Infraqurylymdyq jobalardy eńbek resýrstarymen qamtamasyz etý úshin ońtústik aımaqtardan 35 myń adamdy tartý josparlanǵan. Eńbek kúshi tapshy óńirlerdi qoldaý maqsatynda Eńbek jáne halyqty áleýmettik qorǵaý mınıstrligi jyl saıyn ońtústikten soltústikke qonys aýdarýshylardyń kvotasyn bekitedi. Bıylǵy jyly kvota 6 587 adamdy qurady», - dedi Eraly Toǵjanov.
Sonymen birge vıtse-premer Parlament Senatynyń «Óńir» depýtattyq tobynyń bastamasymen mynadaı is-sharalar pysyqtalyp jatqanyn alǵa tartaly:
− qonys aýdarýshylarǵa memlekettik turǵyn úı qorynan turǵyn úı, sondaı-aq jeke turǵyn úı qurylysy úshin jer ýchaskelerin (aýdany keminde 0,1 ga) berýdi jeńildetý;
− qajetti mamandyqtar boıynsha jumysqa ornalasatyn qonys aýdarýshylar, sondaı-aq olardyń jumys berýshileri turǵyn úı salý kezinde óz qarajaty esebinen jumsaǵan shyǵyndaryn óteý (keminde 50 %);
− sýbsıdııalarǵa qol jetkizý úshin qonys aýdarýshylardyń kredıt bereshegine kanıkýldar belgileý (merzimi 6 aıdan 1 jylǵa deıin).
«Baıandalǵannyń negizinde shekara mańyndaǵy óńirlerdi damytý jónindegi derbes baǵdarlamany ázirleýdiń qajettiligi joq dep sanaımyz», - delingen Premer-Mınıstrdiń orynbasarynyń jaýabynda.
