Ońtústikten Soltústikke bıyl 900-deı otbasy kóshýdi josparlap otyr
ShYMKENT. QazAqparat - Ońtústikten Soltústikke bıyl 900-deı otbasy kóshýdi josparlap otyr. Memleket qoldaýymen qolǵa alynǵan baǵdarlama boıynsha ótken jyly 250 otbasy qonys aýdarǵan bolatyn. Sóıtip teriskeıdegi elge el qosylyp, jumys kúshi tolyqtyryldy. Osyndaı jetistikke kóńili tolǵan soltústiktegi aımaq ókilderi bıyl halqy tyǵyz ornalasqan Maqtaral jurtymen kezdesip, bos jumys oryndarynyń jármeńkesin uıymdastyrdy, dep habarlaıdy QazAqparat HAA tilshisi.
«Serpin» - elge serpin beretin joba. Elbasy Joldaýyndaǵy eńbek naryǵyn damytý boıynsha qolǵa alynǵan is osylaısha qarqyn ala bastady.
«Maqtaral óńirimizdegi halqy tyǵyz aýdan bolǵandyqtan, kezdesýdi osy aýmaqtan bastadyq. 3 kúndik óńiraralyq semınar ótkizip, sońy jármeńkege ulasty. Aımaqaralyq ekonomıkalyq qarym-qatynasty arttyrý úshin delegatsııa quramynda bıznes ókilderi de kelip otyr. 636 jumys berýshi bas-aıaǵy 1785 bos jumys ornyn usynýda», - dedi oblys ákiminiń orynbasary Erbol Sadyr.
Maqtaralda búginde 350 myńǵa jýyq halyq turady. Sonyń 8 myńdaıy jumyssyz. Al, turǵyn úı kezegine 300 azamat tirkelgen. Sondyqtan shalǵaıdaǵy aýdan turǵyndaryna Soltústikke kóshý tıimdi bolmaq.
«Aýdanda jylyna on myńǵa jýyq sábı ómirge keledi. Úı berse, árıne barady. Ol jaq agrarly aımaq bolǵan soń, osy baǵyttaǵy jumysshylar óte qajet. Sondaı-aq, muǵalimder, densaýlyq saqtaý salalarynda da maman tapshy eken», - deıdi Maqtaral aýdany ákiminiń orynbasary Altyn Eshanqulova.
Soltústik Qazaqstan oblysynan kelgen kásipkerler bolsa, jeke sharýa qojalyqtaryna jumysshylar tapshy ekenin aıtyp otyr. Ásirese, mal baǵyp, tórt túlikke kútim jasaıtyn sharýalar qajettiligi týyndaǵan.
«Maldy baǵyp, onyń sútin, etin satamyz. Úımen qamtamasyz etemiz. Azyq-túligi tegin. Ekeýara kelisip, nesıege ózine de mal alsyn. Sóıtip, qora bar, jaı bar. Ekeýmizge de jetedi. Malyn kóbeıtsin. Aılyq tóleımiz», - deıdi jeke kásipker Erlan Dúısenov.
