Ońtústikten Soltústikke 37 otbasy qonys aýdardy

30 sáýir kúni eki avtobýspen jolǵa shyqqan kóshtiń alǵashqy tobyn  «Nur Otan» HDP OQO fılıaly tóraǵasynyń birinshi orynbasary Álimjan Qurtaev, oblys ákiminiń orynbasary Erbol Sadyr bastaǵan jergilikti bılik ókilderi shyǵaryp saldy, dep habarlady OQO ákiminiń baspasóz qyzmetinen.

«Buǵan deıin qonys aýdarǵandar azamattardyń 70 paıyzy jumyspen qamtylyp otyr.  Olar óz mamandyqtary boıynsha jumysqa ornalasýmen qatar aýyl sharýashylyǵy salasynda mal, egin sharýashylyǵymen aınalysýǵa 7 myń gektardan astam jer alyp,  birneshe aýyl koopreratıvterin quryp,  jeke kásipkerlik ashyp isterin dóńgeletip otyr. Sondyqtan osy saparlaryńyz sátti bolyp, soltústiktiń eline el bolyp qosylýlaryńyzǵa tilektespiz» , - dedi oblys ákiminiń orynbasary Erbol Sadyr.  
 

Ońtústik Qazaqstan turǵyndaryn elimizdiń jumys kózi kóp aımaqtaryna qonys aýdarý sharasy aıasynda atalǵan otbasylar soltústiktiń Aıyrtaý, Aqjar, Jumabaev, Esil jáne Ýálıhanov aýdandaryna baryp qonystanady.

Bıyl qonys aýdarǵan otbasynyń árbir múshesine 35 aılyq eseptik kóleminde, ıaǵnı shamamen 80 myń teńge bir rettik kómek beriledi. Sonymen qatar, bir jylǵa deıin turatyn úıdiń jaldaý aqysy men kommýnaldyq tólemderi óteletin bolady.
 

Kúngeıden teriskeıge kóshken otandastarymyzdyń deni  aýyl sharýashylyǵymen aınalysýdy josparlap otyr.

Esterińizge sala keteıik, elimizdiń soltústik óńirlerindegi jumys berýshiler sáýir aıynda halqy tyǵyz ornalasqan Shymkent qalasy men Maqtaaral, Saryaǵash  aýdandarynda bos jumys oryndary jármeńkesin ótkizgen bolatyn. Osynyń nátıjesinde búginde 700-ge jýyq otbasy soltústikke qonys aýdarýǵa nıet bildirip otyr.

Al, Ońtústik Qazaqstan oblysynan ótken jyly 146 otbasy nemese 572 adam Qazaqstannyń ózge óńirlerine qonys aýdarǵan. Onyń ishinde 125 otbasy Soltústik Qazaqstan oblysyna, qalǵandary Qostanaı jáne Shyǵys Qazaqstan oblystaryna kóship barǵan.