Ońtústikten ShQO-ǵa esirtkiniń asa iri partııalary jetkizilip otyrǵan

ÓSKEMEN. QazAqparat – Shyǵys Qazaqstan oblysynyń tártip saqshylary «qara» naryqta baǵasy 21 mln teńgeden asatyn esirtki partııasyn tárkiledi, dep habarlaıdy QazAqparat tilshisi.

ShQO Polıtsııa departamenti esirtki qylmysyna qarsy is-qımyl basqarmasynyń qyzmetkerleri «Qarasora-2020» jedel aldyn alý sharasy barysynda qylmystyq top múshelerin ustady. 34 jáne 39 jas aralyǵyndaǵy úsh er adamnyń biri Almaty qalasynyń turǵyny bolyp shyqty.

Olar kannabıs esirtkisiniń asa iri kólemdegi partııalaryn ońtústik aımaqtardan Shyǵys Qazaqstanǵa logıstıkalyq kompanııalar arqyly jetkizip otyrǵan.

«Kúdiktilerdiń biriniń garajyn tintý kezinde eki sómkege salynǵan 7 polımerli paket tabyldy. Onyń ishinde ótkir ıisi bar, jasyl tústi ósimdiktektes zat bolǵan. Saraptama nátıjesinde, onyń salmaǵy 30 keliden asatyn keptirilgen marıhýana ekeni anyqtaldy. Onyń «Qara» naryqtaǵy quny 21 mıllıon teńgeden asady», - deıdi departament bastyǵy Saǵat Mádıev.

Sondaı-aq esirtkini oraýǵa arnalǵan zattar men 1 mıllıon teńgeden astam aqsha tárkilengen.

Qazirgi ýaqytta QR QK-niń 277-baby 3-bóligine sáıkes sotqa deıingi tergeý amaldary júrgizilýde. Zańdy belden basqandar 10-15 jylǵa deıin bas bostandyǵynan aıyrylýy múmkin.