Ońtústikten 231,5 mln dollardyń aýylsharýashylyq ónimi eksporttaldy
ASTANA. QazAqparat - Ońtústik Qazaqstan oblysynda sońǵy jyldary aýyl sharýashylyǵy salasyna memleket tarapynan aýqymdy qoldaýlar kórsetilip, agroónerkásip kesheninde jaqsy nátıjelerge qol jetkizildi. Máselen, ótken jyly 40 myńǵa jýyq aýylsharýashylyq taýar óndirýshileri memlekettik qoldaýǵa ıe boldy.
Osynyń nátıjesinde 2017 jyly aýyl sharýashylyǵynda jalpy ónim kólemi 522,4 mlrd teńgeni qurap, 2016 jyldyń tıisti kezeńimen salystyrǵanda 77,4 mlrd teńgege artqan. Respýblıkadaǵy aýyl sharýashylyǵy jalpy óniminiń úlesi boıynsha oblys ekinshi orynda. Bul týraly oblystyq aýyl sharýashylyǵy basqarmasynan málim etti.
Sondaı-aq «Aýyl sharýashylyǵyn qarjylaı qoldaý qory» oblystyq fılıalynyń jarǵylyq kapıtaly arqyly bólingen 4,8 mlrd teńge qarjy tolyǵymen ıgerildi. Baǵdarlamany júzege asyrý barysynda 850-ge jýyq sharýa qarjylaı qoldaý aldy.
Salalyq basqarmanyń málimetinshe, aýyl sharýashylyǵy salasynyń negizgi kapıtalyna tartylǵan ınvestıtsııalardyń kólemi 38 mlrd teńgeni qurap, 2016 jyldyń tıisti kezeńimen salystyrǵanda 3,4 esege artqan. Al aýyl sharýashylyǵy eksportynyń kólemi búgingi tańda 231,5 mln AQSh dollaryn, ımport kólemi 356,5 mln AQSh dollaryn quraǵan.
Sonymen birge osy saladaǵy jumysty jandandyrý úshin jańa 1031 dana aýyl sharýashylyǵy tehnıkasy alyndy. Jalpy oblys boıynsha 16530 dana aýyl sharýashylyǵy tehnıkasy bar.
