Ońtústiktegi tolassyz jaýǵan qar: Avtobýs jolaýshylary poıyzdarǵa otyrǵyzyldy
ASTANA. QazAqparat - Tolassyz jaýǵan qardan jolǵa shyǵa almaǵan eki júzden astam avtobýs jolaýshylary mejeli jerge jetý úshin poıyzdarǵa otyrǵyzylyp jatyr, dep habarlaıdy QazAqparat QTJ «Jolaýshylar tasymaly» AQ baspasóz qyzmetine silteme jasap.
«Qolaısyz aýa raıyna jáne Jambyl men Ońtústik Qazaqstan oblystaryndaǵy avtomobıl joldarynyń jabylýyna baılanysty jolaýshylardy mejeli jerge óz ýaqytynda jetkizý úshin barlyq qajetti sharalar júrgizilip jatyr. Qazirgi ýaqytta Tarazdaǵy Jambyl stantsııasynan oblysaralyq avtobýsqa bılet alyp, jolǵa shyǵa almaı qalǵan 200-den astam jolaýshy poıyzǵa otyrady», - delingen mekeme habarlamasynda.
Atalǵan jolaýshylar №21 «Semeı-Qyzylorda», №55 «Kókshetaý-Qyzylorda» jáne №23 «Almaty-Aqtóbe» poıyzdaryna jaıǵastyrylady.
Ulttyq tasymaldaýshynyń qurylymdyq bólimsheleri men ortalyq apparaty kúsheıtilgen rejımde jumys istep jatyr, dep atap ótti kompanııa.
