Ońtústiktegi qalalarda jylý júıesi bý-gaz qondyrǵysyna aýystyrylady
«Ekologııalyq jaǵdaıdy jaqsartýdaǵy taǵy bir mańyzdy másele jumys istep turǵan jylý elektr ortalyqtaryn gazǵa kóshirý bolyp tabylady. Sondaı-aq, taza generatsııalaý kózderin paıdalana otyryp, jańa stantsııalardy salý qajet. 2022 jyly Nur-Sultan qalasynyń birinshi jáne ekinshi Jylý elektr ortalyqtaryn gazǵa aýystyrý jobalary aıaqtalady.
Al Almaty qalasyndaǵy 3 jylý elektr ortalyǵyn gazǵa aýystyrý boıynsha jumystar júrip jatyr. Bul ortalyqtardyń jalpy qýaty 1300 MVt bolady. Jobany aıaqtaý merzimi – 2026 jylǵa deıin», -dedi vedomstvo basshysy.
Sondaı-aq, ol elimizdiń ontústiginde qýaty 2150 MVt bolatyn bý-gaz qondyrǵylaryn salý máselesi pysyqtalyp jatqanyn atady. Bul joba Túrkistan oblysy men qalasyn, Taldyqorǵan, Qyzylorda qalalarynyń ekologııasyn jaqsartady degen esep bar.
«Sonymen qatar, Qaraǵandy oblysynyń Temirtaý qalasynda ArcelorMittal Temirtau stantsııalaryn gazǵa aýystyrý boıynsha jumystar júrip jatyr. Orta merzimdi perspektıvada elimizdegi taý-ken salasyndaǵy iri kásiporyndardy kómirden gazǵa kóshirý josparlanǵan», -dedi mınıstr.
