Ońtústiktegi etnos ókilderiniń 70 paıyzy memlekettik tildi erkin meńgergen

ASTANA. QazAqparat - Ońtústiktegi etnos ókilderiniń 70 paıyzy memlekettik tildi erkin meńgergen. Bul týraly búgin OQO Óńirlik kommýnıkatsııalar qyzmetinde ótken baspasóz máslıhatynda oblystyq tilderdi damytý, arhıvter men qujattama basqarmasynyń basshysy Bastar Esqaraev málim etti.

Onyń aıtýynsha, oblysta 106 etnos ókilderi turady. Sol etnos ókilderiniń basym bóligine óz ana tilinde bilim alýyna mádenıeti men salt-dástúrin ustanýǵa  tolyq jaǵdaı jasalǵan. 

«Ońtústik Qazaqstan oblysy - ulttar men ulystardyń eń kóp shoǵyrlanýymen, eń bastysy olardyń tili, mádenıeti, salt-dástúriniń saqtalýymen erekshelenedi. Búginde memlekettik tildi erkin meńgergen etnos ókilderiniń eresek turǵyndarynyń úlesi 70 paıyzdy quraıdy.  Al óńirde júrgizilgen taldaý jumystarynyń nátıjesinde  memlekettik tildi erkin meńgergen turǵyndardyń úlesi - 92,1% bolsa,  63 % orys tilin,  al, aǵylshyn tilin biletinder - 14 %-ǵa jetip otyr», - dedi basqarma basshysy.

Sondaı-aq, baspasóz máslıhatynda spıker oblysta 20 etnomádenı birlestikterdiń janynda on bir jeksenbilik mektep jumys jasaıtynyn atap ótti. ıAǵnı, ol mektepterdegi on bes topta 1065 etnos ókili óz ana tilderin oqyp-úırenýde eken. 

Jalpy oblystaǵy barlyq aýdan, qalalarda memlekettik tildi jáne orys, aǵylshyn tilderin tegin oqytatyn 14 ortalyq jumys isteıdi. Olarda osy jyldyń jeti aıynda 7 209 azamat bilim alǵan.