Ońtústiktegi arnaıy operatsııa: 16 adam eki aıǵa qamaýǵa alyndy
ShYMKENT. QazAqparat - Elimizdiń ońtústiginde júrgizilgen aýqymdy operatsııa kezinde ustalǵan 35 adamnyń 16-sy qamaýǵa alyndy, dep habarlaıdy QazAqparat tilshisi.
«Ustalǵan 13 kúdiktige «Para alý» baby boıynsha aıyp taǵylýda. Úsheýi «Para alýǵa kómektesý» boıynsha ustaldy. Olarǵa eki aıǵa ýaqytsha tergeý abaqtysyna qamaýǵa alý týraly sanktsııa berildi. Sot sheshimi áli kúnishe engen joq»,-dedi Ál-Farabı aýdandyq sotynyń úılestirýshi sýdıasy Ǵanı Baıarystan.
Qazir qolǵa túsken seziktiler ýaqytsha qamaýǵ alynyp, tergeý amaldary júrgizilýde.
Eske salaıyq, 15 jáne 16 aqpanda elimizdiń ońtústigindegi 3 oblys pen Almaty qalasynda arnaıy aýqymdy operatsııa júrgizilip, nátıjesinde 35 adam ustalǵan bolatyn. Olardyń arasynda keden organynyń, shekara qyzmetiniń laýazymdy tulǵalary, brokerler, deldaldar, sondaı-aq uıymdasqan qylmystyq top músheleri bar.
Al, Ońtústik Qazaqstan oblysy boıynsha ustalǵan 13 adam qazaq-ózbek memlekettik shekarasyndaǵy «Saryaǵash», «Qazyǵurt», «Atameken», «Qaplanbek» shekara beketteriniń qyzmetkerleri bolǵan. Júrgizilgen aýqymdy is-sharalar barysynda barlyǵy 8 uıymdasqan qylmystyq toptyń zańsyz is-áreketterine tosqaýyl qoıylǵan edi. Atalǵan derekter boıynsha ekonomıkalyq kontrabanda, uıymdasqan top, qylmystyq uıym men transulttyq uıymdasqan top qurý jáne olarǵa basshylyq etý, sol sııaqty olarǵa qatysý jáne paraqorlyq faktileri boıynsha sotqa deıingi tergep-tekserý júrgizilýde.
