Ońtústiktegi arheologııalyq muralar fotoalbomy 3 tilde shyqty
Jıynǵa qatysýshylar eń aldymen «Rýhanı jańǵyrý» baǵdarlamasy aıasynda qundy jádigerlerden jasaqtalǵan keshendi kórme men oblysta atqarylǵan jumystar týraly fılmniń kórsetilimin tamashalady.
Ulttyń uıytqysy Ońtústik Qazaqstanda bolǵan basqosýda «Rýhanı jańǵyrý» baǵdarlamasynyń aıasynda óńirde atqarylǵan jumystar qorytyndylanyp, aldaǵy mindetter men josparlar talqylandy. Rýhanı qundylyqtyń jandanýyna baǵyttalǵan otyrysta jazýshy, dramatýrg Marhabat Baıǵut, respýblıkalyq «Aıqyn» gazetiniń bas redaktory Nurtóre Júsip, fılologııa ǵylymdarynyń doktory, professor Dıhan Qamzabekuly men memleket jáne qoǵam qaıratkeri, fılosofııa ǵylymdarynyń doktory, professor Amangeldi Aıtaly syndy elimizdiń birqatar azamattary sóz alyp, óz oılarymen bólisti.
«Rýhanı jańǵyrý» baǵdarlamasynyń Ońtústik Qazaqstan oblysynda oryndalý barysy men alda turǵan mindetter jaıyn baıandaǵan oblys ákimi Janseıit Túımebaev álemdegi árbir ulttyń áleýeti tarıhtyń sabaqtarynan úlgi alýy men tájirıbe jınaqtaýdaǵy qabiletine tikeleı baılanysty ekenin atap ótti.
«Elbasy usynyp otyrǵan rýhanı jańǵyrýdyń negizgi sıpaty ótken men bolashaqty úılestire júzege asyrý bolǵandyqtan, biz muny eki arnada iske asyrýymyz qajet. Onyń biri - ǵalamdyq jetistikterdi ózimizge ákelý arqyly jahandyq damýda óz úlesimizdi alý. Ekinshisi - ótken tarıhymyz ben dástúrimizdegi asyl qundylyqtarymyzdy qaıta jańǵyrtyp, ulttyq biregeıligimizdi saqtap qalý. Osy oraıda, Elbasy aýqymy keńeıip, «Týǵan elge» ulasatyn «Týǵan jer» baǵdarlamasyn qolǵa alýdy usynyp, ony júzege asyrýdyń naqtyly joldaryna deıin kórsetip berdi. Osy maqsatta óńirimizde «Týǵan jer» arnaıy jobasy boıynsha búgingi kúnge kásipkerler, demeýshiler tarapynan óńirlik jobalar júzege asyrylýda»,- dedi oblys ákimi.
Jalpy alǵanda oblysta «Rýhanı jańǵyrý» baǵdarlamasyn júzege asyrý maqsatynda qurylǵan óńirlik Jobalyq keńse tarapynan 46 joba, 168 is-shara ázirlenip, júzege asyrylýda.
Budan bólek, oblystaǵy aıryqsha mańyzy bar tarıhı-mádenı sáýlettik jáne arheologııalyq eskertkishteriniń fotoalbomy qazaq, orys, aǵylshyn tilderinde jasalynyp, taratyldy.
Tarıhı-mádenı muralardy nasıhattap, jastarǵa patrıottyq tárbıe berý maqsatynda «Kóne jetigenniń syry» atty 10 serııaly telehıkaıa, «Kıeli Qazyǵurt», «Otyrardy qorǵaý», «Kúsh atasy - Qajymuqan» atty anımatsııalyq jáne «Uly Jibek jolyndaǵy eskertkishter» derekti fılmderi túsirilip, qoǵam nazaryna usynyldy.
Jıyndy qorytyndylaǵan oblys ákimi Janseıit Qanseıituly «Rýhanı jańǵyrý» - táýelsiz elimizdiń baqytty bolashaǵy men alańsyz keleshegi úshin jasalyp jatqan jumys ekenin bas aıtty.
