Ońtústikte jylqyny úıirimen urlaǵandar qolǵa tústi

Barymtashylardyń jábirlenýshige jalpy sommasy 6,5 mıllıon teńgege jýyq shyǵyn keltirgeni anyqtalyp otyr, dep habarlaıdy QazAqparat HAA tilshisi.
 

Ótken jyldyń jeltoqsan aıynda Otyrar aýdandyq ІІB-niń kezekshi bólimine 36 jastaǵy jergilikti turǵyn úıir jylqysynyń urlanǵany týraly shaǵymdanǵan. Polıtseıler aýyl shetindegi jaıylymda júrgen 22 bas jylqyny belgisiz bireýler aıdap áketkenin anyqtaǵan. Jedel-izdestirý sharalaryn júrgizý barysynda Túrkistan qalasynyń eki  turǵyny kúdikti retinde ustaldy. Olar óz kinásin tolyq moıyndaǵan. Ári aıǵaq zat retinde urlanǵan jylqylardyń bir bóligi qaıtaryp alyndy.
 

Qazir osy oqıǵa boıynsha  QR QK-niń 188-shi «Urlyq» babymen qylmystyq is qozǵalyp, sotqa deıingi tergeý amaldary júrgizilýde. Sondaı-aq seziktilerdiń ózge de mal urlyǵy qylmystaryna qatystylyǵy tekserilip jatyr.