Ońtústikte joǵalǵan úsh balyqshy izdestirilýde
ShYMKENT. QazAqparat - Ońtústik Qazaqstan oblysynda joǵalǵan úsh balyqshy izdestirilýde. Sozaq aýdanynyń turǵyndary 1 sáýir kúni balyq aýlaýǵa shyǵyp ketken eken, dep habarlaıdy QazAqparat HAA tilshisi.
Oblystyq tótenshe jaǵdaılar departamentine balyqshylardyń joǵalǵany týraly habar keshe túsipti. Qazir qutqarý qyzmetiniń ókilderi Sozaq aýdanyna baryp, Shý ózenine ketken balyqshylardy izdestirip jatyr.
«Keshe saǵat 13:05-te bizge osyndaı habar kelip tústi. Sozaq aýdanynyń 1979, 1980 jáne 1986 jyly týǵan turǵyndary Shý ózenine ketip, qaıtyp oralmaǵan. Qazirgi tańda olardy qutqarý qyzmetiniń arnaıy jasaǵy men aýdandyq ákimdik qyzmetkerleri birlesip izdestirýde. Bul sharalarǵa úsh arnaıy tehnıka bólindi»,-deıdi oblystyq TJD baspasóz qyzmetiniń bas mamany Zarıpa Turysbekova.
Aıta keteıik, Teriskeı Alataýy men Qyrǵyz Alataýynan bastaý alatyn Shý ózeniniń sońy osy Sozaq aýdanyna tirelip, jerge sińip ketedi. Ádette kóktemgi kezde sý teriskeı jerine deıin keledi. Sý deńgeıi azaıǵanda Jambyl oblysynyń aýmaǵynda aıaqtalady.
