Ońtústikte joǵalǵan úsh balyqshy Betpaqdaladan tabyldy
ShYMKENT. QazAqparat - Ońtústik Qazaqstan oblysynda joǵalǵan úsh balyqshy Qaraǵandy oblysynan tabyldy. Tórt táýlik boıy iz-túzsiz ketken turǵyndar Betpaqdaladan bir-aq shyqqan. Qutqarýshylar olardy Qyzemshek aýylynan 200 shaqyrym jerden taýyp aldy, dep habarlaıdy QazAqparat HAA tilshisi.
Oblystyq TJD baspasóz qyzmetiniń málimetinshe 1 sáýir kúni joǵalǵan balyqshylardy izdeýge qutqarýshylarmen birge ishki ister, ákimdik qyzmetkerleri men jergilikti turǵyndar jumyldyrylǵan. 20 adamnan quralǵan iz kesýshiler birneshe topqa bólinip, 7 tehnıkamen ózendi, jazyq dalany qarap shyqqan.
«Balyqshylardy 5 sáýir kúni tańǵy saǵat 9-dan bastap izdestirdik. Qutqarýshylar olardyń kólikteriniń izimen júrip otyryp, izdestirý sharalaryn júrgizdi. Al, keshki 18:30-da M.Zasolın, D.Skırýk, A.Nıchaev Qaraǵandy oblysy aýmaǵynan tabyldy. Betpaqdalaǵa bet alǵan úsheýdiń kólikterinde janar-jaǵar maıy taýsylyp, baılanys quraldary óship qalypty. Sóıtip eshkimge habarlasa almaı qalǵan. Tabylǵan jeri ózderi turatyn Qyzemshek kentinen 200 shaqyrymdaı jer. Jaǵdaılary qalypty»,- deıdi oblystyq TJD baspasóz qyzmetiniń bas mamany Zarıpa Turysbekova.
Endi ne sebepti Betpaqdalaǵa attanyp habarlaspaı ketkenin balyqshylar jergilikti ishki ister qyzmetkerlerine túsindirýde. Eske salaıyq, tórt kún boıy iz-túzsiz joǵalyp ketken balyqshylar kesheden bastap izdestirilgen bolatyn. Qutqarýshylar olardy Sozaq aýdany aýmaǵynan ótetin Shý ózeni boıynan izdestirgen edi.
