Ońtústikte jeri sorlanǵan maqta alqaptarynyń ornyna baqshalar egile bastady
ShYMKENT. QazAqparat - Ońtústik Qazaqstan oblysynda jeri sorlanǵan maqta alqaptarynyń ornyna baqshalar egilip jatyr.
Maqtaaral aýdanynda bıyl tehnıkalyq daqyl - maqta alqabynyń qatary 3 myń gektarǵa azaıyp, ornyna kartop, kókónis jáne baqsha daqyldary men jemis-jıdek egý qolǵa alynýda. Bul týraly búgin aýdan ákimi Ǵalymjan Ismaılov málimdedi, dep habarlaıdy QazAqparat HAA tilshisi.
Jýrnalıstermen ótken brıfıngte aýdan basshysy Maqtaral aýdanynda 138 myń gektar sýarmaly jer bar ekenin aıta kele, onyń 4,5 myń gektaryna baqsha ósimdikteri, 34 myń gektaryna kókónis pen kartop, 13 myń gektaryna burshaqty jáne mal azyqtyq daqyldary egilgenine toqtaldy. Al, qarqyndy baýlar kólemin 70 gektarǵa ulǵaıtý josparlanyp qoıǵan.
«Intensıvti baýlar - 940 gektar. Onyń barlyǵy Evropadan ákelingen. Sony bıyl 105 gektarǵa kóbeıtý josparlanǵan. Odan keıin jylyjaıdy kóbeıtýimiz kerek. Byltyr maqta bizde 83 myń gektarǵa egilgen. Bıyl - 80 myń gektar».- dedi aýdan ákimi.
Sonymen birge, aýdan basshysy 2016 jyly Maqtaaralda aýyl sharýashylyǵy salasynda óndirilgen jalpy ónimniń kólemi 64 mlrd. 489,7 mln. teńgeni quraǵanyn atap ótti. Bul 2015 jylmen salystyrǵanda 4,8 mlrd teńgege artqanyn kórsetedi. Óndirilgen ónim kólemin 2021 jylǵa deıin 90,4 mlrd. teńgege jetkizý josparlanyp otyr. Bul rette Ǵalym Ismaılov egis qurylymyn ártaraptandyrý arqyly aýyspaly egisti engizý nátıjesinde mol ónim alý kózdelip otyrǵanyn habarlady.
«Aýdanda maqta daqyly negizgi daqyl bolyp sanalatyny bárimizge belgili. Sondyqtan maqta daqylynan mol ónimge qol jetkizý úshin birinshiden tuqymdyq shıtke kóńil bólýimiz qajet. Byltyrǵy jyly aýdanda tuqymdyq shıt jetispeýshiligi oryn aldy. Osy jaǵdaıdyń aldyn alý úshin aýdanda arnaıy jumysshy top qurylyp, nátıjesinde bıyl aýdanda 2985 tonna shıt daıyndalady dep josparlandy. Onyń ishinde orıgınal - 2 tn, elıta - 45 tn, R-1 - 385 tn, R-2 - 100, tehnıkalyq shıt - 2453. Búgingi tańda aýdanymyzda 2502 tonna shıt daıyn. Odan bólek aýdannyń kásipkerleri tarapynan Qytaı, Túrkııa meleketterinen qosymsha tuqymdyq shıt alyp kelý úshin jumystar júrgizilýde. Bul shıttiń kólemi bıylǵy jyly egiletin alqapqa tolyq jetkilikti bolady dep josparlap otyrmyz», - dedi aýdan ákimi.
Baspasóz jıynynda, Ǵalym Ybyraıuly tuqym máselesin túpkilikti sheshý úshin jer kólemi aýqymdy sharýashylyq basshylarymen jumystar júrgizilip jatqanyn da atap ótti. Spıker, sondaı-aq, aýyl sharýashylyǵy daqyldarynan mol ónim alýdyń negizgi kepilderiniń biri egistik alqaptardy der kezinde jáne qajetti mólsherde aǵyn sýmen qamatamasyz etý ekenin atap ótip, búgingi tańda aýdanda uzyndyǵy 2,7 myń shaqyrym bolatyn 1316 sý arnasy baryn jetkizip, sýarý jumystaryn oıdaǵybdaı júrgizý josparlanyp otyrǵanyn eskertti. Sondaı-aq, Maqtaaraldyń ákimi aýyl sharýashylyǵy tehnıkalarynyń qatary jyl saıyn jańalanyp otyratynyn málimdep, bıyl 182 dana jańa tehnıkany alý boljanyp otyrǵanyn jetkizdi.
