Ońtústikte jarkenttik júgeri ósiriledi
ASTANA. QazAqparat - Ońtústik Qazaqstan oblysynyń ákimi Janseıit Túımebaev Qazaq ósimdik qorǵaý jáne karantındeý ǵylymı-zertteý ınstıtýtynyń bas dırektory, bıologııa ǵylymdarynyń doktory, UǴA akademıgi Abaı Saǵıtov bastaǵan ujymmen kezdesti. Keleli keńes barysynda óńirimizdegi agrosalaǵa serpin beretin júgerý daqylyn egý jáne egistik alqaptarda bıogolgııalyq ádisti keńinen qoldaný máselesi sóz boldy, dep habarlaıdy oblystyq ákimdiktiń baspasóz qyzmeti.
Ǵalym oblys ákimine 100 gektar alqapqa tájirıbe retinde júgeri egý jónindegi bıznes josparyn tanystyrdy. Abaı Orazulynyń aıtýynsha, ozyq tehnologııamen egiletin jarkenttik júgeri tuqymynyń sapasy artyp, tıimdiligi molaıa túsken. Bir gektardan orta eseppen 140 tonnaǵa deıin sılos, 30 tonnaǵa deıin tuqymdyq alýǵa múmkindik bar eken. Byltyr Almaty oblysy jańa tehnologııalyq ádispen 76 myń gektardan asa alqapqa júgeri daqylyn ósirip, ár gektarynan 60-62 tsentnerden ónim jınapty. Ásirese, bul daqyldy baptaýda Jarkent óńiriniń eginshileri ozyq tehnologııa men tájirıbege baı.
«Keńes zamanynda ońtústik óńiri júgeri egýden aldyńǵy qatarly aımaqqa aınalǵanyn jaqsy bilemiz. Qazirgi ahýal múlde basqasha. Sýarmaly egistik alqaby qysqaryp, júgeri daqylynyń kólemi edáýir azaıyp ketti. Endigi maqsat - óńirimizde júgeri alqaptarynyń kólemin arttyrý qajet. Bul rette sońǵy zamanaýı tehnologııalyq ádisterdi keńinen paıdalanǵan abzal», - dedi Janseıit Qanseıituly.
Óńir basshysy Qazaq ósimdik qorǵaý jáne karantındeý ǵylymı-zertteý ınstıtýtynyń bas dırektoryna oblysymyzdan fılıal ashýǵa keńes berdi. Bul óz kezeginde oblys dıqandaryna sońǵy úlgidegi agrotehnologııalyq ádisterdi keńinen qoldanýǵa múmkindik beretin bolady.
«Júgeri daqyly kún kózin jaqsy kóredi. Kúmis jelbezekti júgerini «dala arýy» dep ataıtynymyz da sondyqtan. Al Ońtústik Qazaqstanda kún kózi jetkilikti. Jer qunarlylyǵy da erekshe. Alǵashqy qadam retinde 100 gektarǵa júgeri eksek, odan 300 tsentnerge deıin ónim alýǵa bolady. Eger tuqym jaqsy jersinse, mol ónimge qol jetkizsek, alda júgeri alqabyn kóbeıtemiz», - deıdi Abaı Orazuly.
Kezdesý sońynda ǵalym ósimdik qorǵaýda taza tehnologııalarǵa belsendi túrde kóshý, zııankesterden qorǵaý, ýly hımıkattardan arylý jónindegi tájirıbelerin bólisýge ázir ekenin de jetkizdi.
