Ońtústikte Ulystyń uly kúni kıeli Qazyǵurttan bastalady

ASTANA. QazAqparat - Bıyl Ońtústik Qazaqstan oblysynda Naýryz merekesi kıeli Qazyǵurt taýynyń bókterinde atalyp ótiledi. Merekelik shara 21 naýryz kúni ótedi. Búgin bul týraly OQO óńirlik kommýnıkatsııalar qyzmetinde ótken brıfıngte oblystyq mádenıet jáne tilderdi damytý basqarmasy basshysynyń mindetin atqarýshy Asylhan Temirhan málim etti.

Onyń aıtýynsha, «Naýryz - Qazyǵurttan bastalady» merekelik is-sharasy aıasynda teatrlandyrylǵan qoıylymdar kórsetilip, kontserttik baǵdarlamalar uıymdastyrylady.

«Qazyǵurttaǵy mereke kúni taý bókterinde kemetektes sahna qoıylady. 40 shaqty kıiz úı ornatý josparlanyp otyr. Óńirdegi óner maıtalmandary el aldynda án men bıden shashý shashady. Sondaı-aq,  qolóner sheberleriniń ónimderi men ulttyq taǵamdardyń kórmesi-jármeńkesi ótedi. Ulttyq sporttyq oıyndar boıynsha túrli jarystarda qatysýshylar baq synaıdy. Salt-dástúrge arnalǵan qoıylymdar qonaqtarǵa merekelik kóńil syılaıtyn bolady», - dedi Asylhan Temirhanuly.

 

Budan bólek, 19-21 naýryz aralyǵynda oblystaǵy barlyq qala, aýdandarda «Jyl arqaýy - jyl basy Naýryz», «Qosh keldiń, áz - Naýryz!», «100 kitap» syndy sýret kórmeleri men jas aqyndar aıtystary ótedi.

 

Sonymen qatar, Shymkent qalasynda Qoshqar Ata ózeniniń bastaýynda «Qoshqar-Ata Seıili» atty kóktem festıvali uıymdastyrylyp, Naýryz merekesine oraı Zoobaqtyń maýsymdyq ashylýy bolady.

 

Merekelik shara 22 naýryz kúni Shymkent qalsyndaǵy Naýryz alańynda «Naýryz kóktem - Shymqala!» merekelik is-sharasymen jalǵasady. Onda jurt «Naýryz-dýman» merekelik sherýin tamashalaıdy. Sondaı-aq, Qazaqstan estrada juldyzdarynyń qatysýymen merekelik kontsert ótedi. Ulttyq sport túrlerinen oıyndar kórsetilip, shara sońy merekelik otshashýmen aıaqtalady.

   

23 naýryz kúni Ulystyń uly kúni merekesine oraı oblys ortalyǵynda kitap festıvali men respýblıkalyq «Naýryz» aqyndar aıtysy uıymdastyrylady.