Ońtústikte TJD mamandary taýdaǵy qaýipsizdikti saqtaýdy shaqyrdy
ShYMKENT. QazAqparat - Ońtústik Qazaqstan oblysynda jyl basynan beri qutqarý jasaǵynyń qyzmetkerleri taýly aýdandarǵa 3 ret izdestirý-qutqarý sharalaryna shyǵyp, 5 adamǵa kómek kórsetti. Ótken jyldyń osy mezgilinde qutqarýshylar 7 shaqyrylymǵa baryp, 12 adam qutqarylǵan bolatyn. Bul týraly óńirlik kommýnıkatsııalar qyzmetinde ótken brıfıngte OQO TJD Jedel-qutqarý jasaǵy memlekettik mekemesi basshysynyń orynbasary Talǵat Baısarıev aıtyp berdi, dep habarlaıdy QazAqparat tilshisi.
Talǵat Baısarıevtiń sózinshe, taýdaǵy qaıǵyly jaǵdaılar negizinen qaýipsizdik sharalaryn saqtamaýdan bolady.
«Taýdaǵy keleńsiz oqıǵalardyń aldyn alý úshin tańdalǵan baǵyt qatysýshylardyń daıyndyq deńgeıine jáne múmkindikterine sáıkes kelýi tıis. Sondaı-aq, qozǵalys baǵdaryn muqııat zerdeleý qajet. Ondaǵy jer bederiniń sıpatymen, qaýipti jerleri men sý kózderinen habardar bolyp, taýǵa shyǵar aldynda aýa raıy boljamymen tanysyp alý kerek», - dedi Talǵat Esalyuly.
Mamandardyń pikirinshe, taýly óńirde qaıǵyly jaǵdaıdy boldyrmaý úshin adamdar toptasyp júrgenderi abzal. Taý kólderinde shomylmaǵan lázim, óıtkeni, sýyq tıip qalý qaýpi bar. Kún kúrkirep, naızaǵaı oınaǵan kezde taýdyń etegine túsýge áreket etý kerek. Sondaı-aq, temiri bar zattardy adamdardan qashyq ustap, jeke aǵashtyń astyna, tańbalaý baǵanalardyń tusyna jáne sý qoımasy jaǵasynda otyrmaǵany abzal.
Aıta keteıik, jyl basynan beri óńirlik TJD qaýipsizdikti saqtaý sharalarynan habardar etetin 7000-ǵa jýyq únparaq taratyp, 165 ret túsindirý jumystaryn júrgizgen. Al, tótenshe jaǵdaı oryn alǵan jaǵdaıda azamattarǵa barlyq baılanys quraldaryna tegin qyzmet kórsetetin táýlik boıy jumys isteıtin «101» jáne «112» nómirlerine habarlasýlaryna bolady.
