Ońtústikte toǵyz aıdyń ishinde 153 myń tonna et óndirildi

ASTANA. QazAqparat - Ońtústik Qazaqstan oblysynda mal sharýashylyǵy baǵytynda ósim baıqalady. Máselen, iri qara maldyń sany ótken jyldyń tıisti kezeńimen salystyrǵanda 5,8 paıyzǵa artyp - 950 myń basty, qoı men eshki 1 paıyzǵa artyp  - 4 mln. 252 myń basty, jylqy 19,5 paıyzǵa kóbeıip - 291 myń basty, túıe 6,9 paıyzǵa artyp - 26 myń basty, al qus sany 2,6 mln basty qurady, dep habarlaıdy QazAqparat óńir ákimdigine silteme jasap.

Statıstıkalyq málimetke sáıkes, oblystyń barlyq aýylsharýashylyq sanatynda óndirilgen ónim boıynsha da ósim baıqalady. Atap aıtar bolsaq, osy jyldyń toǵyz aıynda óńirde 153,4 myń tonna et (tiri salmaqta) óndirildi, bul ótken jylǵymen salystyrǵanda 4,9 paıyzǵa kóp. Al osy ýaqyt ishinde 575,4 myń tonna sút óndirilip - 101,9 paıyzǵa, 254,6 mln dana jumyrtqa óndirilip - 109,6 paıyzǵa artyp otyr.

Munan bólek, mal sharýashylyǵyn damytý maqsatynda jasalynǵan memlekettik «Sybaǵa» baǵdarlamasymen 14 516 bas iri qara, «Altyn asyq» baǵdarlamasymen 26 230 bas qoı, «Qulan» baǵdarlamasy aıasynda 2557 bas jylqy satyp alynyp, mal tuqymy asyldandyryldy.

Jalpy agrarly aımaqta osy jyldyń toǵyz aıynda quny 376,5 mlrd teńge bolatyn aýyl sharýashylyǵy ónimi óndirildi.  Bul ótken jyldyń tıisti kezeńimen salystyrǵanda 57 mlrd. teńgege kóp. Óndirilgen ónimniń 172 mlrd. teńgesi mal sharýashylyǵy baǵytynda bolsa, 203,5 mlrd. teńge kólemindegi ónim egin sharýashylyǵy boıynsha túsken.