Ońtústikte sý tasqyny qaýpi bar - V.Bojko
ASTANA. QazAqparat - Ońtústik Qazaqstan oblysynda aýa raıynyń kúrt jylynýyna oraı sý tasqyny qaýpi bar. Bul týraly búgin Úkimet otyrysynda QR Tótenshe jaǵdaılar mınıstri Vladımır Bojko málim etti.
«Ońtústik Qazaqstan oblysynyń daıyndyǵy joǵary. Degenmen, 13-14 naýryz kúnderi Shymkentte 20 gradýs jyly bolatyndyǵyn eskerip men osy oblystaǵy tótenshe jaǵdaılar departamentine Qarataý taýyna taqaý aýdandarǵa jáne basqa da taýly aýdandarǵa erekshe nazar aýdarýǵa nusqaý berdim», - dedi ol.
Mınıstrdiń atap ótýinshe, jalpy, bul oblystyń sý tasqynyna qarsy engizgen tájirıbesi oń. Óńirde oqý-jatyǵý kezinde ǵana emes, aı saıyn bıýdjetten qarjy bólý arqyly qaýipti aýmaqtardyń ınjenerlik jabdyqtalýyn júrgizip otyrady. «Ákimdik osy qajettilikterge barlyǵy 1,2 mlrd. teńge qarjy bóldi», - dedi V.Bojko.
