Ońtústikte órik gúldep jatyr
ShYMKENT. QazAqparat - Ońtústikte órik gúldep jatyr. Taýyq jylynyń qysy aımaq úshin qıyn bolyp, biraz ábigerge túsirgeni belgili. Degenmen naýryz aıynda kún jylynyp, jer kógere bastady.
Kúni keshe óńirde aýa raıy 27 gradýsqa deıin jylyndy. Búgin de temperatýra 20 gradýsqa deıin kóterilgen. Mamandardyń sózinshe, óriktiń oıanýy úshin aýa raıy bir aptadan asatyn ýaqyt 10 gradýs shamasynda jyly bolyp turýy kerek. Al aǵash búr jaryp, gúl ashýy úshin oıanǵan soń bir apta temperatýra 20 gradýstaı ysýy tıis. Jemis aǵashtary sál kesh gúldeıdi eken. Olar aýa raıynyń turaqtanýyn kútedi eken. Bolmasa sýyqqa urynyp, úsip ketýi múmkin. Degenmen jergilikti turǵyndar sáýir aılarynda aıaz bolyp, kóp aǵashtyń gúli túsip qalmasa eken dep alańdaýly. Sebebi, aldyńǵy jyldary jemis aǵashtary gúldegen kezde qardyń túsýinen ónim úsip ketken bolatyn. Aýa raıyn boljaıtyn mamandar sáýir aıynda elimizge salqyn tsıklon keletinin aıtady. Biraq qatty sýyq bolmaıdy eken.
