Ońtústikte «Ólketaný» kúni atalyp ótti
ShYMKENT. QazAqparat - Ońtústikte "Ólketaný" kúni atalyp ótti. 1 naýryz - Alǵys aıtý kúni merekesi qarsańynda bastalǵan onkúndik búgin «Týǵan jer - tunǵan tarıh» taqyrybynda ótken is-sharamen jalǵasyn tapty, dep habarlaıdy QazAqparat tilshisi.
Qazaqstan halqy Assambleıasynyń uıymdastyrýymen shym shahardaǵy №45 mektep-gımnazııasynda ótken merekelik jıynǵa oblystaǵy etnomádenı birlestikterdiń tóraǵalary men músheleri, zııaly qaýym ókilderi, tarıhshylar jáne jastar qatysyp, týǵan jerdiń tarıhy jaıly áńgime qozǵady.
«Qıyn-qystaý zamanda ómir súrse de, kúshtep qonys aýdarylǵan túrli etnostardy baýyryna basyp, bir úzim nanymen bólisken qazaq halqyna degen alǵysymyz sheksiz. Bizdiń bir ǵana Otanymyz bar, ol Táýelsiz Qazaqstan! Tarıhymyz, búgingi jetistigimiz, bolashaqqa degen ortaq jaýapkershiligimiz qoǵamdy birtutastyqqa bastaıdy. Muny búgingi jas urpaq tereń uǵynýy tıis», - dedi oblystyq Qazaqstan halqy Assambleıasy tóraǵasynyń orynbasary, oblystyq koreı etnomádenı birlestiginiń tóraıymy Roza Pak.
Bul kúni, sondaı-aq, oblystyq «Jastar resýrstyq ortalyǵynda» da týǵan aýylyna kómek bergen janashyr jandardyń jastarmen erkin formatta kezdesýi ótti.
«Týǵan jer» baǵdarlamasy aıasynda munan bólek oblystyń barlyq qala-aýdandaryndaǵy orta mektepterinde ashyq sabaqtar men kezdesýler ótkizildi. Onda týǵan ólkedegi kıeli jáne tarıhı oryndardy jurtshylyq sanasynda qaıta jańǵyrtý maqsatynda kónekóz qarııalar men aqsaqaldar shaqyrtylyp, oqýshylarmen suhbattar órbidi. Aıta keteý kerek, oblysta josparlanǵan onkúndik is-shara erteń 27 aqpan - «Kelisim kúni» retinde atalyp ótedi.
