Ońtústikte náresteler ólimi tómendep, ómir súrý jasy uzarǵan
ASTANA. QazAqparat - Kentaýda densaýlyq saqtaý salasyndaǵy kórsetkishter jaqsaryp keledi, dep habarlaıdy OQO ákiminiń baspasóz qyzmeti.
Bul týraly búgin OQO Aımaqtyq kommýnıkatsııalar qyzmetinde uıymdastyrylǵan baspasóz konferentsııasynda Kentaý qalasynyń ákimi Ábdibaqyt Maqulbaev aıtty.
Ákimniń sózine qaraǵanda, kendiler shaharynda halyqtyń ortasha ómir súrý uzaqtyǵy 67 jastan 70 jasqa joǵarylaǵan. Sáıkesinshe, náresteler ólim-jitim kórsetkishi 1000 balaǵa shaqqanda 17,1%-dan 4,6%-ǵa tómendese, jalpy ólim-jitim kórsetkishi 1000 adamǵa shaqqanda 7,1%-dan 1,6 %-ǵa azaıǵan. Sondaı-aq, týberkýlez dertimen syrqattanýshylyq 1000 adamǵa shaqqanda 85%-dan 27%-ge tómendep, qan aınalym júıesinen bolǵan ólim-jitim kórsetkishi 1000 adamǵa shaqqanda 137,2%-dan 10,7%-ge, onkologııalyq aýrýdan bolǵan ólim-jitim kórsetkishi 1000 adamǵa shaqqanda 35,8%-dan 15%-ǵa kemipti.
Sondaı-aq qala ákimi shahardyń áleýmettik-ekonomıkalyq damýyna áser eter ınvestıtsııa, taý-ken óndirisi, ónerkásip, aýyl sharýashylyǵy, kommýnaldy sharýashylyq syndy birqatar salalardaǵy jetistikterdi baıan etti.
«Kentaýdaǵy ındýstrıaldy aımaqta ınfraqurylym júıeleri tolyǵymen júrgizilip, jalpy quny 1998,5 mln.teńgege 5 joba ornalastyryldy. Onyń búginge deıin ekeýi iske qosylsa, qalǵan 3 joba - «Asfalt-beton qospasyn óńdeý zaýyt qurylysy», «Kıslorod shyǵarýdy uıymdastyrý» jobasy jáne «Medıtsınalyq buıymdar shyǵarý» jobasy jyl sońyna deıin iske qosylatyn bolady», - dedi shahar basshysy.
Á. Maqulbaev Kentaý halqynyń aýyz sýmen qamtylyp, tabıǵı gazǵa qol jetkizý jolynda atqarylyp jatqan birqatar jumystardy aıtyp berdi. Qalada kóriktendirý, kógaldandyrý jáne abattandyrý jumystary da júrgiziletin bolady. Jalpy ákim qala boıynsha 25,9 ga jerge 19150 kóshetter otyrǵyzylsa, aǵymdaǵy jyly S. Qojanov saıabaǵyna kúrdeli jóndeý, Qonaev, Abaı dańǵyldary, Kalenov kóshesi jáne «Jastar ortalyǵy» alleıalarynyń abattandyrý jumystary bastalatyndyǵyn atap aıtty.
