Ońtústikte «Meniń Qazaqstanym» oblystyq ən baıqaýynyń jeńimpazdary anyqtaldy
Elbasynyń «Bolashaqqa baǵdar: rýhanı jańǵyrý» maqalasyndaǵy «Týǵan jer» baǵdarlamasyn júzege asyrý maqsatynda jáne Ońtústik Qazaqstan oblysynyń 85 jyldyǵyna arnap uıymdastyrylǵan óner saıysy bıyl Teriskeı jerinde ótti. Sazger Shámshi Qaldaıaqovtyń shyǵarmalaryn, onyń ishinde týǵan jerge arnalǵan patrıottyq ánderin nasıhattaý men jas talant ıelerin anyqtaý maqsatyn tutqan baıqaýǵa aýdan, qalalar men oqý oryndarynan 15-29 jas aralyǵyndaǵy óner ıeleri qatysty. Ánshilerdiń oryndaý sheberlikterin sarapqa salǵan qazylar alqasy bas júldeni shym shahardyń «Saryn» tobyna berse, birinshi orynǵa Sozaq aýdanynan Aqerke Jumasheva laıyq dep tanyldy. Ekinshi dárejedegi júldemen shardaralyq Qalamqas Qojanazarova marapattalsa, shymkenttik ánshi Áljan Nurlybek úshinshi oryndy ıemdendi.
Al, Ońtústik Qazaqstan oblysynyń əkimi Janseıit Túımebaevtyń arnaıy júldesimen shymkenttik - «Arbat» toby, Sozaq aýdany ákiminiń arnaıy júldesimen Robert Jetkerbaev marapattaldy. Sonymen qatar, «Aqmańdaılym» júldesi Maqtaral aýdanynan Malıka Qaldybaıǵa, «Aqsuńqarym» júldesi Shymkent qalasynan qatysqan Sanat Álimhanovqa, «Bárinen de sen sulý» júldesi Sozaq aýdanynyń «Shabyt» kvıntetine, "Eń jas oryndaýshy» júldesi Bəıdibek aýdanynan kelgen Asan Sydyqovqa berildi.
Sozaq aýdandyq «Dostar» ortalyq stadıonynda ótken jeńimpazdardy marapattaý rásiminen keıin, gala-kontsert ótti. Onda elimizge tanymal estrada ənshileri men Shámshi Qaldaıaqov atyndaǵy oblystyq fılarmonııa men oblystyq opera jáne balet teatrynyń ónerpazdary, Súgir atyndaǵy qazaq ult-aspaptar orkestri, «Qazyna», «Tumar» bı ansamblderi jáne balet toby qatysyp, óner dýmanyn asqaqtatty.