Ońtústikte meni «orys» dep ataıdy - jemqorlyqqa qarsy departament basshysy Kómekbaev
ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Ońtústik Qazaqstan oblysy boıynsha departament basshysy Álı Kómekbaev "ońtústiktiń xalqy bir-birine aqsha berip úırengen" degen sózdi estigen.
Alaıda ózi ondaıǵa jol bermeýge tyrysady. Sol sebepti ony "orys" dep ataıdy, dep xabarlaıdy QazAqparat tilshisi.
"Meniń týyp ósken jerim - Ońtústik Qazaqstan oblysy. Qara shańyraq sonda. Biraq 18 jyl boıy men osynda - Astanada jumys jasadym. Endi, ońtústikke qyzmet babymen baryp otyrmyn. Iá, "ońtústiktiń xalqy bir-birine aqsha berip úırengen, sóıtip bir-birin baıytady" degendi men de estigenmin. Biraq ózim ony kórmeımin. Joq dep, taǵy aıta almaımyn. Degenmen, "ondaı júıe qalyptasyp ketken" degen sózben kelispeımin. Maǵan da túrli áńgimeler túsedi. Ol jaqta meni "orys" dep aıtady da. Óıtkeni ondaı qarym-qatynasqa jolamaımyn. Óıtkeni men tárbıemdi osy agenttikte aldym. Osy ortalyq apparatta tárbıemdi alyp bardym. Maǵan adam keledi, kómektesshi dep suraıdy. Men oǵan saıtty kórsetem de, ishinde daıyndyq testeri bar deımin. Solaı daıyndal deımin", - dedi Kómekbaev búgin Astanada ótken baspasóz máslıxatynda.
Onyń aıtýynsha, ońtústik óńirde birge oqyǵan jáne birge jumys istegen qatarlastary kóp. Keıbir adamdar solar arqyly tanys-tamyrlastyq izdeıdi eken. Alaıda dostary qolyn bir siltep: "Odan nátıje shyqpaıdy. Ol "orys" bolyp ketken", - dep jaýap qaıtaratyn kórinedi.
Aıta keteıik, búgin elordada ótken baspasóz máslıxatynda Á.Kómekbaev memkyzmet.kz atty qosymsha saıttyń tanystyrylymyn ótkizdi. Atalǵan portalda memlekettik qyzmetkerler ǵana emes, memlekettik qyzmetke júginetin qarapaıym azamattar da qajetti aqparatty ala alady. Sonyń arqasynda jemqorlyq áreketterdiń aldyn alýǵa múmkindik bar. Budan bólek, departament basshylyǵy mektep dırektorlaryn taǵaıyndaý boıynsha oblys ákimine tıisti usynystarynengizýdi kózdeıd i.
