Ońtústikte mektep dırektorlarynyń keń kabıneti men jeke hatshysy bolmaıdy
TÚRKІSTAN. QazAqparat - Túrkistan oblysynda mektep dırektorlarynyń keń kabıneti men jeke hatshysy bolmaıdy. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttigi Túrkistan oblysy boıynsha departamentiniń ókili Aqtóre Talǵatuly málimdedi, dep habarlaıdy QazAqparat tilshisi.
Aqtóre Talǵatulynyń sózinshe, «Túrkistan - adaldyq alańy» jobalyq keńsesiniń bastamasymen oblystaǵy barlyq bilim jáne densaýlyq saqtaý uıymdary basshylarynyń qyzmettik bólmelerin birinshi qabattaǵy shaǵyn kabınetterge aýystyrý naýqany bastalǵan. Osylaısha basshylar qoǵammen erkin keri baılanys ornatatyn bolady. Al, dırektorlardyń kabınetinde túrli úıirmeler men qosymsha sabaqtar ótkiziledi. Bul bastama búginde Báıdibek aýdanynda qolǵa alyna bastady. Aldaǵy ýaqytta aýyl ákimderinde de qabyldaý bólmesi men hatshylyq qyzmeti joıylmaq.
«Bul rette eshkim jumystan shyǵarylmaıdy. Tek dırektor men is-qaǵaz júrgizýshisi bólek kabınetke jaıǵasady. Atalǵan sharany oblys kóleminde 1 sáýirge deıin tolyq júrgizý josparlanyp otyr»,- deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttigi Túrkistan oblysy boıynsha departamentiniń ókili Aqtóre Talǵatuly.
