Ońtústikte maqtanyń tonnasy 150 myń teńgeden qabyldanyp jatyr
TÚRKІSTAN. QazAqparat - Túrkistan oblysynda bıyl 131 myń gektar alqapqa maqta egilip, 343,6 myń tonna shıtti maqta jınaý josparlanyp otyr, dep habarlaıdy QazAqparat óńirlik kommýnıkatsııalar qyzmetine silteme jasap.
Óńirde búgingi tańda 25,8 myń tonna shıtti maqta jınaldy, ol - jalpy qordyń 8%-y. Aımaqta qaıta óńdeýmen aınalysatyn 16 zaýyttyń 7-eýi shıtti maqtanyń bir tonnasyn 150 myń teńgeden qabyldaı bastady.
Búgin bul týraly Túrkistan oblysy óńirlik kommýnıkatsııalar qyzmetinde aýyl sharýashylyǵy basqarmasynyń basshysy Nurbek Badyraqov málimdedi. Onyń aıtýynsha, oblysta jınalǵan shıtti maqtany alǵashqy óńdeýden ótkizetin 16 kásiporynda 184 qabyldaý beketi jumys isteýde.
«Sharýalardy qoldaýǵa oraı, ónimderge sýbsıdııa tólenetin boldy. Bul baǵytqa 1,9 mlrd teńge qarjy qaralǵan. Máselen, maqta ónimine sýbsıdııa alý úshin maqta óńdeý zaýytyna qaıta óńdeýge tapsyrylǵan shıtti maqtanyń 1 tonnasyna 12 myń teńge tólense, qaıta óńdeýge tapsyrylǵan nemese sáıkestik sertıfıkaty bar óńdeýge ótkizilgen kúrishtiń 1 tonnasyna 4 myń teńge sýbsıdııa beriledi», - dedi Nurbek Baqtybaıuly.
Aıta keterligi, sharýalar sýbsıdııa alý úshin qaıta óńdeý kásipornymen jasalǵan aýyl sharýashylyǵy ónimin tapsyrý týraly sharttar, sondaı-aq qaıta óńdeý kásiporny men aýyl sharýashylyǵy taýar óndirýshi nemese aýyl sharýashylyǵy kooperatıvi arasynda qujat jáne qaıta óńdeý kásiporny shekken shyǵyndy rastaıtyn tólem qujattaryn usynýy tıis.
