Ońtústikte kelisi jyly 30 shaǵyn sý qoımasy salyna bastaıdy
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaevtyń tóraǵalyǵymen tótenshe jaǵdaılardyń aldyn alý jáne joıý komıssııasy otyrysynyń kezekti májilisi ótti. Jıynǵa komıssııa músheleri, aýdan, qala ákimderi men jaýapty baskarma basshylary qatysty.
Keńeste sý tasqyny qaýpiniń aldyn alý jáne joıý boıynsha 2017-2020 jyldarǵa arnalǵan «Jol kartasy» jobasyna engizilgen 1-kezeńdik is-sharalardyń júzege asyrylý barysy talqylandy. Bul jóninde oblystyq aýyl sharýashylyǵy basqarmasynyń basshysy mindetin ýaqytsha atqarýshy Turǵanbek Ospanov baıandama jasady.
Onyń aıtýynsha, óńirdegi sý tasqynyna qarsy 98 ınjenerlik is-shara atqarylyp, sý jınaqtaý kólemi 342,75 mln. sharshy metrdi quraıtyn 30 shaǵyn sý qoımasy aıqyndalǵan. Nátıjesinde 12 nysan boıynsha jobalaý-smetalyq qujattama ázirlengen. Bıyl jergilikti bıýdjetten eki nysanǵa 174, 2 mln. teńge bólinse, qalǵan 10 nysanǵa 960,98 mln. teńge qarastyrylǵan. Alaıda respýblıkalyq jol kartasyn bekitý kezinde Ońtústik Qazaqstan oblysy boıynsha 29 nysan engizilmeı qalǵan. Osy qalǵan 29 nysan boıynsha oblystyq deńgeıde arnaıy is-sharalar kesheni ázirlenip, oblystyq bıýdjetten 2,1 mlrd. teńge bólingen. Jalpy quny shamamen 6,3 mlrd. teńge bolatyn 30 shaǵyn sý qoımasynyń qurylysyn júzege asyrý eki kezeńnen turady. Búgingi kúni atalǵan jospardyń birinshi kezeńinde jalpy quny 3,8 mlrd. teńge bolatyn 5 jobany iske asyrý josparlanǵan.
Kún tártibindegi ekinshi másele - oblys aýmaǵyndaǵy seısmıkalyq qaýipsizdikti qamtamasyz etý boıynsha energetıka jáne turǵyn úı-kommýnaldyq sharýashylyq basqarmasynyń basshysy Marǵulan Maraıym baıandama jasady. Onyń aıtýynsha, jalpy oblysymyzda 3253 kópqabatty turǵyn úı bar. Onyń búginde 1393-i kúrdeli, 1035-i aǵymdaǵy jóndeý jumystaryn qajet etedi. Al tehnıkalyq zertteý qorytyndysyna saı oblysta qaıta qalpyna keltirýge jatpaıtyn apatty 14 úı bar. Budan bólek, 18 úıdiń seısmo jaǵdaıyn nyǵaıtý qajet. Bıyl jeti úıge oblystyq bıýdjet esebinen 753,0 mln. teńge bólingen.
Qaralǵan úshinshi másele - asa qaýipti juqpaly aýrýlardyń aldyn alý. Bul týraly Ońtústik Qazaqstan oblysynyń qoǵamdyq densaýlyq saqtaý departamentiniń basshysy Nurbek Nyshanov jan-jaqty baıandady. Oblysymyzda kene shaǵý jaǵdaılary byltyrǵy jylmen salystyrǵanda 28,9 paıyzǵa tómendedi.
Jıyndy qorytyndylaǵan oblys ákimi jaýapty basqarma basshylaryna negizgi úsh másele tóńireginde naqty tapsyrmalar júktedi.
«Aýdan, qala bıýdjeti esebinen arnaıy baǵdarlama ashyp, apattyq jáne eski turǵyn úılerdi buzý jáne seısmonyǵaıtý jumystaryn kúsheıtý qajet. Bul rette, qurylys sapasy qatań qadaǵalaýǵa alynýy tıis», - dedi Janseıit Qanseıituly.
Sondaı-aq ákim óńirdegi asa qaýipti juqpaly aýrýlardyń aldyn alý jumystaryna jiti mán berýdi tapsyrdy. Bul rette kóshelerde sút jáne et ónimderiniń baqylaýsyz satylýyna jol berilmeýi kerektigi júkteldi.
