Ońtústikte «Qazaq jastary qandaı bolý kerek?» degen saýalǵa jaýap izdedi

ShYMKENT. QazAqparat - «Aýyl» partııasynyń Ońtústik Qazaqstan oblystyq fılıalynda Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn jastarǵa túsindirý baǵytynda kezdesý ótti.

Basqosýda «Qazaq jastary qandaı bolý kerek?» degen másele de sóz boldy, dep habarlaıdy QazAqparat tilshisi.

Kezdesýge aýdan-qalalardan jastar, «Intellekt» ınkýbator qoǵamdyq qorynyń tóraǵasy men elimizge belgili bloger Nurlan Janaı jáne Kitap klýbtarynyń úılestirýshisi Máýlen Janbolat qatysty.
 

Baǵdarlamalyq maqalada «Tabysty bolýdyń eń irgeli, basty faktory bilim ekenin árkim tereń túsinýi kerek. Jastarymyz basymdyq beretin mejelerdiń qatarynda bilim árdaıym birinshi orynda turýy shart. Sebebi, qundylyqtar júıesinde bilimdi bárinen bıik qoıatyn ult qana tabysqa jetedi» degen bolatyn.

Osy baǵytta Nurlan Janaı «Qazaq jastary qandaı bolý kerek» atty taqyrypta oıyn bólisip, áleýmettik jelide qoldy bos ótkizbe kerektigin atap ótti. Elbasynyń bilimdi damytýdaǵy sózderimen kompıýterlik  IT tehnologııasyn joǵary dárejede meńgerip, tildi damytý, sonyń ishinde aǵylshyn tilin meńgerý qanshalyqty qajet ekenin jan-jaqty túsindirdi. Al, Máýlen Janbolat álemniń ozyq elderimen salystarǵanda bizdegi jastardyń kitap oqý paıyzynyń tómendigi men kitap oqýdyń jan-jaqty paıdasyn aıtyp ótti.
 

Jıynda sondaı-aq qazaq jastary táýelsizdiktiń qunyn jete túsinip, onyń ǵumyry uzaq bolýy úshin ultqa qaltqysyz qyzmet etý kerektigi sóz boldy. Spıkerler osy baǵytta aıanbaı eńbek etý men qolda turǵan altynnyń qadirin bilip, babalar amanatyna qııanat jasamaý basty paryzymyz dep atap ótti.