Ońtústikte dıhandar sý tapshylyǵymen betpe-bet kelip otyr: Máýlen Áshimbaev problemalardy atap ótti
Aıta keteıik, Palata otyrysynda Senat depýtattary Aýyl sharýashylyǵy mınıstri Erbol Qarashókeevtiń sýarmaly jerlerdi paıdalaný jáne sý únemdeý tehnologııalaryn engizý jónindegi aqparatyn tyńdaǵan bolatyn. Jıyn barysynda Máýlen Áshimbaev Túrkistan oblysynyń turǵyndaryn alańdatyp otyrǵan problemalardy aıtyp, Syrdarııa transshekaralyq ózeniniń jaǵdaıyna qatysty máselege toqtaldy.
«Osy aptada Senatta Jergilikti ókildi organdarmen ózara is-qımyl jasaý jónindegi keńestiń otyrysy ótti. Sol jıynda Túrkistan oblysynan kelgen áriptesterimiz Jetisaı, Maqtaral aýdandaryndaǵy máselelerdi kóterdi. Negizgi túıtkil – «Dostyq» kanaly arqyly keletin sý kóleminiń azaıýy. Máselen, kórshi memlekettermen jasasqan sharttarǵa sáıkes elimizge sekýndyna 40 tekshe metr sý kelýi kerek. Alaıda, búginde ol kórsetkish shamamen 25 tekshe metr kóleminde ǵana degen aqparat bar», - dedi Palata spıkeri.
Sonymen qatar, Máýlen Áshimbaev elimizdiń ońtústik óńirlerinde aýyl sharýashylyǵy mańyzdy sala ekenin, ony damytý kórshi memleketterden keletin sýdyń kólemine tyǵyz baılanysty bolyp otyrǵanyn aıtty. Máseleniń oń sheshilmeýi aımaqtaǵy sharýalardyń narazylyǵyn týdyrǵanyn tıek etken Senat tóraǵasy tıisti memlekettik organdardy osy salada belsendilik tanytýǵa shaqyrdy. Mundaı jaǵdaı keshendi tásildi, sondaı-aq depýtattardyń ǵalymdarmen jáne sarapshylarmen birlesip jumys isteýin talap etetinin aıtty.
«Keıbir óńirlerde topyraqtyń ereksheligine baılanysty negizinen tek kúrish ósiriletini belgili. Alaıda, bıýrokratııalyq kedergilerdi kóldeneń tartyp, sharýalarǵa kúrish egýge shekteý qoıa almaıtynymyz túsinikti. Onymen másele sheshilmeıdi. Bul jerde jan-jaqty oılastyrylǵan, pysyqtalǵan keshendi jumys qajet. Qalyptasqan jaǵdaıdy zerttep, ózara aqyldasyp, osy saladaǵy sarapshylarmen keńesip otyryp sheshim qabyldaý kerek. Bul – mınıstrdiń bir buıryǵymen sheship tastaıtyn másele emes», - dedi Máýlen Áshimbaev.
Spıker kóterilgen taqyrypqa sáıkes basymdyqtardy iske asyrý úshin Senat Úkimetpen yntymaqtasa jumys isteýge de daıyn ekenin atap ótti. Otyrys barysynda jasalǵan barlyq usynys osy is-sharanyń qorytyndysy boıynsha ázirlenetin usynymdarǵa engizilip, Úkimetke joldanady.
