Ońtústikte bokstan halyqaralyq týrnır bastaldy
ShYMKENT. QazAqparat - Ońtústik Qazaqstan oblysynda bokstan 2004-2005 jyly týǵan jasóspirimder arasynda Keńes Odaǵynyń Batyry Beısen Ońtaevty eske alýǵa arnalǵan HHHV Halyqaralyq týrnır bastaldy. Arys qalasyndaǵy dene shynyqtyrý-saýyqtyrý sport kesheninde ótetin saıysqa Qazaqstan, Ózbekstan jáne Qyrǵyzstan elderiniń bylǵary qolǵap sheberleri keldi, dep habarlaıdy «QazAqparat» HAA tilshisi.
Óskeleń urpaq arasynda salaýatty ómir saltyn nasıhattap, sheberlikterin shyńdaý, ózara dostyq qarym-qatynasty nyǵaıtý maqsatynda uıymdastyrylǵan baıraqty dodada 312 sportshy baq synaýda. 
Dástúrli týrnırdiń ashylý saltanatyna qatysqan qala ákimi Murat Qadyrbek boksshylarǵa bıik tuǵyrdan kórine berýlerine tilektestigin bildirdi. Sonymen qatar, jarysqa qonaq retinde shaqyrylǵan Bokstan álem chempıony Qaırat Eralıevti jeńisimen quttyqtap, syı-qurmet kórsetti.
Aıta keteıik, bas-aıaǵy 42 komandadan quralǵan boksshylar ártúrli salmaq dárejesinde saıysqa túsedi. Halyqaralyq týrnırlerde judyryqtasyp júrgen jas sportshylar qazirdiń ózinde sharshy alańǵa shyǵyp, jekpe-jekterin bastap ketti. Aldymen irikteý saıysynan ótken boksshylar medaldar úshin básekege túsip, ózara myqtyny anyqtaıdy.
Jarysty uıymdastyrýshylardyń sózinshe, týrnır 29 kúni qortyndylanyp, jeńimpazdar marapattalatyn bolady.
