Ońtústikte bıyl áleýmettik 116 nysannyń qurylysy aıaqtalady
ShYMKENT. QazAqparat - Ońtústik Qazaqstan oblysynda bıyl 209 ınvestıtsııalyq joba iske asyrylyp jatyr. Atalǵan nysandardyń 116-sy jyl sońyna deıin tapsyrý josparlansa, 93 nysan keler jylǵa ótpeli. Bul týraly búgin oblys ákiminiń birinshi orynbasary Darhan Satybaldynyń tóraǵalyǵymen shtab otyrysynda málim boldy, dep habarlaıdy QazAqparat HAA tilshisi.
Májiliske aýdan, qala ákimdikteri men basqarma basshylary jáne nysan qurylysyn júrgizip jatqan merdigerler, tehnıkalyq qadaǵalaýshy mekemeler qatysty. Jıynda oblys aýmaǵyndaǵy áleýmettik jáne turǵyn úı qurylysy nysandarynyń qurylys-montaj jumystary men jobalaý-smetalyq qujattamalardyń ázirlený barysy talqylandy. Atalǵan shtab otyrysynda oblys ákiminiń birinshi orynbasary qurylysy júrgizilip jatqan nysandardyń memlekettik bıýdjetten bólingen qarjylarynyń merziminde tolyq jáne sapaly ıgerilýin qadaǵalaýdy tapsyrdy. Sondaı-aq, qurylys jumystarynyń barysyn baqylap, nysandardyń merziminde paıdalanýǵa berilýin qadaǵalaýǵa aýdan jáne qala ákimdikteri men salalyq basqarmalary basshylary jaýapty ekenin málimdedi.
