Ońtústikte aýyl sharýashylyǵynda ekoenergııa qoldanylady
ASTANA. QazAqparat - Búgin Ońtústik Qazaqstan oblysynyń ákimi Janseıit Túımebaev qazaqstandyq «Tree Energy» JShS-niń basshysy Janbolat Muzbaevpen kezdesti. Kezdesý barysynda taraptar balamaly energııa kózderin aýyl sharýashylyǵy salasyna keńinen qoldaný máselesin talqylady, dep habarlaıdy QazAqparat.
Óz kezeginde sóz alǵan kompanııa basshysy búginde el aýmaǵynda 40 myń sharýa qojalyǵy energııa kózderine qol jetkize almaı otyrǵanyna toqtaldy. Osy rette ol jel generatorlaryn ornatý - utymdy dep esepteıdi.
«Tree Energy kompanııasy búginde balamaly energııa kózderin izdeý men óndirýde sátti jumys atqaryp keledi. Munyń bári el aýmaǵyndaǵy kún men jeldiń múmkindigin qoldanyp kórý ıdeıasynan týyndaǵan bolatyn. Alǵashqy qoldanysty garajda iske asyryp kórdik. Búgingi tańda ne Reseıde, ne Ortalyq Azııada balamasy joq biregeı jel generatoryn zaýytta óndirý deńgeıine jetip otyrmyz», - dedi Janbolat Muzbaev.
Búginde balamaly energııa kózderi ǵylymı ortada úlken qyzyǵýshylyq týǵyzyp otyr. Atap aıtqanda, Danııa jel generatorlarynyń kómegimen barlyq elektr qýatynyń 40 paıyzyn óndirse, Portýgalııa - 23 paıyzyn, Ispanııa - 16, Irlandııa - 14, Germanııa 8 paıyzyn óndirýge qaýqarly. Al Qazaqstanda nebári 0,5 paıyzdy ǵana quraıdy.
Kompanııanyń múmkindikterimen tanysyp shyqqan oblys ákimi jel kúshimen óndiretin elektr energııasy qýatyn aýyl sharýashylyǵyna qoldanýdyń tıimdi ekenine toqtaldy.
«Ońtústik Qazaqstanda jel kúshimen alynatyn elektr energııasy qýatyn keńinen jáne mol óndirýge bolady. Óıtkeni bizde úzdiksiz jel soǵyp turatyn aımaqtar barshylyq. Jel energııasynyń basqa energııa kózderinen ekologııalyq jáne ekonomıkalyq artyqshylyqtary kóp. Sondyqtan aldaǵy ýaqytta jel energııasyn turaqty paıdalaný úshin jel energetıkasy qondyrǵylaryn basqa energııa kózderimen keshendi túrde ushtastyrý ıdeıasyn tolyǵymen qoldaımyz», - dedi Janseıit Qanseıituly.
Aıta keteıik, Ońtústik Qazaqstanda tabıǵı resýrstardy paıdalana otyryp, 207,3 MVt bolatyn balamaly elektr energııasyn óndiretin 6 joba júzege asyrylýda. Bul jobalar Tólebı, Saryaǵash, Maqtaral, Báıdibek, Otyrar aýdandarynda júrgizilýde.
