Ońtústikte «aspannan vırýs shashady» dep jalǵan aqparat taratqan taǵy bir áıel ustaldy
SARYAǴASh. QazAqparat – Túrkistan oblysy Saryaǵash aýdanynda polıtseıler áleýmettik jeli arqyly jalǵan aqparat taratyp, jurtty dúrliktirgen áıeldi anyqtady. Ol WhatsApp jelisi arqyly «Saryaǵashta vırýs shashady» dep jalǵan aqparat taratqan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, keshe áleýmettik jelide «Túngi 2-3 arasynda Saryaǵashta balalardy aýyrtatyn vırýs sebiledi eken, balalardy kóshege shyǵarmasyn dep jatyr» degen habarlama taraǵan. Bul jalǵan aqparatty taratqan áıeldi anyqtaý maqsatynda jedel-izdestirý sharalary júrgizilip, nátıjesinde onyń kim ekeni anyqtaldy. Ol Saryaǵash qalasynyń turǵyny bolyp shyqty.
Tekserý barysynda anyqtalǵandaı, áıel bul habarlamany tek týystary kóshege shyqpaı, úıde otyrýy úshin jazǵan. Ony tek kelinine WhatsApp jelisi arqyly joldaǵanyn jetkizgen.
«Atalǵan jaıt QR QK-niń 274-babymen tirkeldi. Osy oraıda polıtseıler Túrkistan oblysynyń turǵyndaryn osyndaı jalǵan aqparattarǵa senbeýge shaqyrady. Sondaı-aq, dálel-dáıeksiz, el ishin dúrliktiretin aqparat taratqandar QR Qylmystyq kodeksiniń 274-baby boıynsha jaýapqa tartylatynyn da eskertedi» delingen habarlamada.
Aıta keteıik, kúni keshe osyndaı zańbuzýshylyq áreketi úshin Otyrar aýdanynyń 47 jastaǵy turǵyny ustalǵan bolatyn. Ol áleýmettik jelide «Saryaǵash aýdanynda tústen keıin vırýs sebiledi eken, balalardy dalaǵa shyǵarmańyzdar» degen jalǵan aqparat taratqan.
Orta jastaǵy áıel qazirgi tańda quzyrly organdarmen ákimshilik jaýapkershilikke tartylǵan.
