Ońtústikte Alǵys aıtý kúninde jańadan bosanǵan analarǵa qurmet kórsetildi
ShYMKENT. QazAqparat - Ońtústik Qazaqstan oblysynda Alǵys aıtý kúni keń kólemde atalyp ótti. Merekelik sharalar aıasyna Sozaq aýdanynda jańadan bosanǵan analarǵa qurmet kórsetildi, dep habarlaıdy QazAqparat tilshisi.
Aýdan ortalyǵy Sholaqqorǵanda aýrýhana ujymy elimizdiń demografııalyq damýyna úles qosqany úshin jas analardy quttyqtady. Olarǵa aq oramal men gúl syılap, náresteleriniń alǵashqy qujatyn saltanatty túrde tabys etti. Aýdandyq Ájeler keńesi jas analarǵa batasyn berip, otbasylyq qundylyqtar jaıly taǵylymdy áńgime aıtty.
Aıta keteıik, atalǵan perzenthanada ótken jyly 1493 sábı dúnıege kelse, bıylǵy eki aıda 153 sábı ómir esigin ashty. Bilikti mamandardyń arqasynda eki jyl qatarynan ana men bala ólimi tirkelmegen.
