Ońtústikte 86 myń tonna alma jınaldy
ShYMKENT. QazAqparat - Bıyl Ońtústik Qazaqstan oblysynyń baǵbandary 86,4 myń tonna alma jınady, QazAqparat dep habarlaıdy oblys ákiminiń baspasóz qyzmeti.
Bıyl óńirde 654,8 gektarǵa qarqyndy alma baýy otyrǵyzylsa, qarqyndy baýdyń jalpy kólemi 2 800 gektarǵa jetip otyr.
Alma ósirý - Ońtústikte aýyl sharýashylyǵynyń basymdy baǵyttarynyń biri. Óńirdiń tabıǵaty qolaıly bolǵandyqtan alma oblystyń kez kelgen aýdanynda ósedi. Degenmen bul sharýashylyqpen aınalysýdy Túlkibas, Qazyǵurt, Tólebı, Saryǵash, Ordabasy jáne Báıdibek aýdanynyń sharýalary myqtap qolǵa alǵan.
Jalpy aımaqta alma ósirýmen aınalysatyn 100-ge jýyq sharýa qojalyqtary bar. Sonyń ishinde «Amangeldi» JShS eń irisi sanalady. Atalǵan seriktestik ıeliginde búginde 530 gektar alma baýy bar. Al, «Arsenal sad» JShS 304 gektar jerde óz baýyn jaıqaltyp otyr.
Ońtústik Qazaqstanda ósirilgen alma jemisi negizinen Qazaqstannyń ózge oblystarymen qatar Reseı men Ózbekstanǵa eksporttalady.
Qalypty alma baýdyń ár gektarynan 20-30 tonna ónim alynsa, qarqyndy baýdan 40-50 tonnaǵa deıin ónim jınaýǵa bolady. Sondyqtan memleket qarqyndy baýmen aınalysamyn degenderge qoldaý kórsetýde.
Máselen, qarqyndy baýdyń ár gektaryna sapasyna qaraı 1 mln-nan 2,8 mln teńgege deıin sýbsıdııa beriledi. Sondaı-aq, otyrǵyzylǵan jemistiń árbir kóshetine 135 teńge sýbsıdııa qarastyrylady. Al, jaı baýdan tek almanyń aport surpyna sýbsıdııa beriledi. Onyń da ózindik talaptary bar. Mundaı baý teńiz degeıinen 900 metr bıiktikte, sonymen qatar egis kólemi 5 gektardan kem bolmaýy tıis. Al onyń ár gektaryna 549 myń teńgeden bastap sýbsıdııa alýǵa bolady.
Búgingi kúnde oblys boıynsha jalpy jemis-jıdektiń egis kólemi 14,4 myń gektardy quraıdy. Bıyl 108 myń tonna jemis (2016 j - 91,3 myń t) jınalǵan.
