Ońtústikte 269 bala AITV ınfektsııasymen ómir súredi
ShYMKENT. QazAqparat - Ońtústik Qazaqstan oblysynda 3 myńǵa jýyq adam AITV (VICh) ınfektsııasyn juqtyrǵandar tiziminde turady.
Olardyń 269-y -balalar. Qaýipti dertke shaldyqqandardyń ómir súrý sapasyn jaqsartý maqsatynda búgin Shymkentte halyqaralyq semınar uıymdastyryldy, dep habarlaıdy QazAqparat HAA tilshisi.
Alqaly jıynda Qazaqstan, Reseı, Ózbekstan, Tájikstan jáne Eýropa eliniń dárigerleri pikir almasyp, naýqastardy emdeýdiń jańa tásilderin talqylady. Mamandardyń sózinshe, qaýipti indetti juqtyrǵandar dertterinen qulan taza aıyǵa almaıdy. Tek olardyń densaýlyǵyn arttyryp, baqylaýda ustap otyrý qajet. Sozylmaly aýrýdyń qasireti de osy. Ǵalymdar XXI ǵasyr dertin emdeýdiń eń ozyq ádisterin zerttegenmen, aıtarlyqtaı nátıje bermeı otyrǵanyn aıtady. Degenmen, qazirgi tańda naýqastardyń ómirin uzartýǵa bolady.
«Emniń alǵashqysy - yqtımal jáne táýekel faktorlardy anyqtaý. Ekinshi baǵyt - AITV ınfektsııasynyń oblystyń emdeý mekemelerine taralýyna jol bermeý, úshinshisi - osy dertke shaldyqqan balalar men olardyń ata-analaryna psıho-áleýmettik reabılıtatsııalyq járdemdi úzdiksiz uıymdastyrý bolmaq»,-deıdi óńirdiń densaýlyq saqtaý basqarmasynyń basshysy Muqan Egizbaev.
Búginde naýqas jandardyń qoǵamnan shettetilip, olarǵa ógeı kózqaras tanytý naýqas balalary bar otbasylar úshin qıyndyqtar týǵyzýda. Bul iste ınfektsııa juqtyrǵan sábıge ata-ananyń járdemi óte mańyzdy. Psıhologtar men dárigerlerge de talaı ter tógýge týra keledi. Ár balaǵa AITV ınfektsııasyna shaldyǵýyna onyń kinási joqtyǵy túsindirilip, aldaǵy ómirin osy dertpen qalaı ótkizetini týraly aıtylýy qajet. Jıynǵa qatysqan mamandardyń pikiri osyǵan saıady.
«Naýqas balalar AITV-ǵa shaldyqqandary jaıly mindetti túrde bilýleri kerek. Álemdik medıtsına talaby osyndaı. Atalǵan jaıtqa qoǵamnyń áli tolyq daıyn emestigi kedergi bolýda. Bul másele TMD elderiniń dárigerleri bas qosqan jıynda da jiti talqylandy»,-deıdi «ıÝNISEF» uıymynyń TMD elderi boıynsha aımaqtyq keńesshisi Rýslan Manıýta.
Dese de dárigerlerge áli de alańdaýǵa negiz bar. Buryn álemde AITV ınfektsııasynyń taralý joly esirtkige elitkender men jynystyq qatynastyń beı-bereketsizdigimen baılanystyrylsa, búginde qan quıýdan da qater kúsheıýde. Reseıden kelgen delegatsııa atalmysh ınfektsııamen kúrestiń bilgirleri sanalady. Olar ońtústik dárigerlerin óz klınıkalarynda daıarlyqtan ótýge shaqyrdy. Oblystyq densaýlyq saqtaý basqarmasynyń basshysy Muqan Egizbaev bul usynysty qabyl aldy.
