Ońtústikte 150 dári túri qymbattamaıtyn boldy
ShYMKENT. QazAqparat - Ońtústik Qazaqstan oblysynda halyq eń kóp qoldanatyn 150 dári jyl sońyna deıin qymbattamaıdy. Búgin Ońtústik Qazaqstan oblysynyń ákimi Janseıit Túımebaev pen «Damý» farmatsevtıkalyq jáne medıtsınalyq qyzmetkerler qaýymdastyǵy arasynda tıisti memorandýmǵa qol qoıyldy, dep habarlaıdy QazAqparat tilshisi.
Oblys ákimdiginde ótken sharaǵa 40 farmatsevtıkalyq uıym basshysy qatysty. Nátıjesinde otandyq dárilik zattar men medıtsınalyq buıymdardy óndirýshi kompanııalar men sheteldik taýarlardyń resmı dıstrıbıýtorlary 150 dárilik zattyń baǵasyn jyl sońyna deıin kótermeıtin bolyp kelisti. 
Sondaı-aq memorandýmǵa sáıkes, atalmysh 150 preparattyń áleýmettik mańyzy zor degen 13-iniń baǵasy edáýir tómendetiledi.
«Osylaısha biz oblys turǵyndarynyń basym bóligine qoldaý kórsetemiz. Halyqtyń áleýmettik álsiz toptaryna qoldap, kelisimge qol qoıyp otyrǵan dárihana basshylaryna Ońtústik jurtynyń atynan rızashylyǵymdy bildiremin», - dedi óńir basshysy.
