Ońtústikte 100 jasty eńsergen 600 qarııa turady
ShYMKENT. QazAqparat - Ońtústik Qazaqstan oblystyq jumyspen qamtýdy úılestirý jáne áleýmettik baǵdarlamalar basqarmasynyń arnaýly áleýmettik qyzmetter kórsetý ortalyǵynda 1 qazan - Qarttar kúnine oraı uıymdastyrylǵan shara ótti. Onda 250-ge jýyq qarııaǵa arnalyp keń dastarhan jaıyldy, dep habarlaıdy QazAqparat tilshisi.
Oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev bastaǵan atqaminerler qazynaly qarııalardy quttyqtap, tartý-taralǵy jasady. Kontserttik baǵdarlamaǵa ulasqan bul kesh ata-ájeılerge kóterińki kóńil-kúı syılady. Jergilikti ónerpazdar aldyńǵy býyn ókilderiniń kóńilin aýlap, áýezdi ánnen shashý shashty.
Aıta keteıik, búginde oblysta 200 myńnan asa zeınetker turady, olardyń 600-i búginde 100 jasty alqymdap otyr. 218-i Ekinshi dúnıejúzilik soǵysqa qatysqan qarttar, 80-nen astamy jalǵyzbastylar. Qýantarlyǵy sol, qarttarǵa degen qamqorlyq jyldan-jylǵa artyp ketedi. Máselen, jalǵyzbasty qarııalarǵa aı saıyn bir aılyq eseptik kórsetkish esebinde qarjylaı kómek beriledi. 10 myńǵa jýyq qart búginde kommýnaldyq qyzmetti tóleýden bosatylyp, qoǵamdyq kólikterde tegin júrýge múmkindik alǵan. Onymen qosa, 3 myńnan asa qarııany túrli basylymdarǵa tegin jazdyrý uıymdastyrylǵan.
