Ońtústikkoreıalyq ushaqtyń shassıi jarylyp, órtenip ketti
ASTANA. QazAqparat - Halyqaralyq Singapore Airshow 2018 avıasalonynda ońtústikkoreıalyq ushaq daıyndyq barysynda janyp ketti, dep habarlaıdy TASS.
Seısenbi kúni ashylǵan Singapore Airshow 2018 avıasalonynda ońtústik koreıalyq «Qara qyrandar» pılotaj tobynyń ushaǵy kórsetilimge daıyndyq barysynda otqa orandy. Uıymdastyrýshylardyń málimetinshe, ushqysh jeńil jaraqattar alǵan.
Keltirilgen málimetterge súıensek, dybystan jyldam ushatyn oqý-jattyǵýǵa arnalǵan T-50 Golden Eagle reaktıvtik ushaǵy Changı áýejaıynan kóterile bergende qorshaýlarǵa soǵylyp artynan órtengen. Bastapqy málimetterge sáıkes ushaqtyń shassıi jarylǵan.
Oqıǵadan keıin áýejaıdyń bir jolaǵy jabylyp, kórsetilimder ýaqytsha toqtatyldy. Ońtústik Koreıa ushqyshtarynan basqa bul jerde Indonezııa, Malaızııa, Sıngapýr, AQSh jáne Taıland áskerı áýe kúshteriniń ushqyshtary óz ónerlerin kórsetýi kerek bolatyn.
