Ońtústikkoreıalyq úsh azamat KHDR-men yntymaqtastyǵy úshin qamaýǵa alyndy
ASTANA. QazAqparat - Ońtústik Koreıada úsh azamat esirtkini tasymaldaý, sondaı-aq KHDR-nyń arnaıy qyzmetterimen yntymaqtastyq ornatqany úshin qamaýǵa alyndy, dep habarlaıdy «Ionhap» agenttiginen.
Seýl prokýratýrasynyń málimetterinshe, Beng esimdi 69 jastaǵy er adam men onyń eki sybaılasy sonaý 1996 jyly Qytaıda júrgen KHDR arnaıy qyzmetkerlerimen kezdesip, olarmen esirtki bıznesin birlesip júrgizý týraly kelisken. Beng jáne onyń sybaılastary jabdyqtar men shıkizatty jetkizýdi, al soltústiktegiler metamfetamın óndiretin oryn daıyndaýǵa ýáde etken.
2000 jyly Beng pen onyń sybaılastary soltústikkoreıalyqtardan 35 keli metamfetamın aldy.
Prokýratýradan habarlanǵandaı, tergeý toby qamaýǵa alynǵandardyń qandaı ispen aınalysyp júrgenderin burynnan bilgen, biraq olardyń qylmysyn soltústikkoreıalyq arnaıy qyzmetkerlerdiń biriniń Ońtústik Koreıaǵa qashýynan keıin ǵana dáleldeý múmkin boldy.
Osylaısha, prokýratýranyń nusqasy boıynsha, Bengtiń sybaılasy - 63 jastaǵy Kım soltústikkoreıalyq agenttermen yntymaqtasyp, KHDR-nan qashqan joǵary ókiletti Hvan Chjan Epqa shabýyl uıymdastyrmaq boldy, alaıda 2010 jyly Hvan júrek talmasynan kóz jumǵan.
