Ońtústikqazaqstandyqtar úshin baspanaly bolýdyń 5 baǵyty ataldy
ShYMKENT. QazAqparat - Ońtústik Qazaqstan oblysynda turǵyn úı kezegine 43 myńnan astam adam tirkelgen. Bul respýblıka boıynsha 3-shi kórsetkish.
Aldaǵy bes jylda óńirde 47 myńnan astam otbasyn baspanamen qamtamasyz etý josparlanǵan. Bul týraly búgin Óńirlik kommýnıkatsııalar ortalyǵynda ótken baspasóz máslıhatynda oblys ákiminiń birinshi orynbasary Darhan Satybaldy málim etti, dep habarlaıdy QazAqparat HAA tilshisi.
Memlekettik «Nurly jer» turǵyn úı qurylysy baǵdarlamasynyń óńirde iske asyrylý barysyn baıandaǵan Darhan Amangeldiuly negizgi bes baǵytqa toqtaldy. Qurylys kóleminiń ósimi 10 paıyzdan asyp, 2021 jylǵa deıin jylyna 1 mıllıon sharshy metrden astam turǵyn úı paıdalanýǵa berilip otyrady.
«Turǵyn úı qurylysynyń damý josparyna sáıkes, óńirimizde 5 jylda barlyq qarjylandyrý kózderi arqyly jalpy 47 619 otbasyn baspanamen qamtamasyz etetin bolamyz», - dedi Darhan Amangeldiuly.
Birinshi baǵyt - ıpotekalyq nesıe berýdiń qoljetimdiligin arttyrý. Munda halyq tarapynan suranysty yntalandyrý maqsatynda, ekinshi deńgeıli bankterdiń ıpotekalyq nesıe berý kólemin arttyrý úshin, jyl saıyn respýblıka boıynsha 10 mlrd. teńge sýbsıdııa beriledi. ıAǵnı, qazirgi tańda bankter arqyly beriletin ıpotekalyq nesıe kólemi jyldyq 17 paıyzdy qurasa, baǵdarlama sheńberinde onyń 7 paıyzy sýbsıdııa bólý arqyly jabylatyn bolady. Al, túpkilikti qaryz alýshyǵa 10 paıyzben, turǵyn úıdi satyp alýǵa nesıe 15 jylǵa deıin berilmek.
Baǵdarlama aıasyndaǵy ıpotekalyq nesıe turǵyndarǵa aı saıynǵy tólemdi 30 paıyzǵa tómendetpek. Bul shara óz tarapynan, ıpotekalyq nesıeni qoljetimdi etip, turǵyndardyń baspana alýyna úlken múmkindikter týǵyzbaq.
«Baǵdarlamanyń kelesi baǵyty - jeke qurylys salýshylardy yntalandyrý. Jeke qurylys salýshylardy yntalandyrý maqsatynda ekinshi deńgeıli bankterge nesıe berý kólemderin keńeıtý arqyly qurylys kompanııalaryn qarjy resýrstarymen qamtamasyz etý kózdelip otyr. Bul maqsatqa jyl saıyn respýblıkalyq bıýdjetten 11 mlrd.teńge sýbsıdııa bólinbek. Sýbsıdııa 3 jylǵa berilip, turǵyn úı qurylys jınaq banki salymshylaryna daıyn turǵyn úıdiń keminde 50 paıyzy usynylatyn bolady. Bul óz kezeginde 157 mlrd.teńgeni sýbsıdııalaýǵa múmkindik berip, 600 myń. sharshy metr turǵyn úı salýǵa sebep bolmaq» , - dedi oblys ákiminiń birinshi orynbasary.
Úshinshi baǵyt - turǵyn úı qurylys jınaqtaý júıesi arqyly kredıttik baspana salý. «Turǵyn úı qurylys jınaq banki» salymshylary, onyń ishinde jergilikti atqarýshy organda kezekte turǵan adamdar úshin kredıttik baspana salý jalǵasatyn bolady.
Munda nesıelik úı qurylysy 2 baǵyt arqyly iske asyrylmaq. Birinshiden, merzimdiligi 2 jylǵa deıin bólingen qarajatty qurylystyń jańa jobalaryna qaıta jumsaý arqyly jergilikti atqarýshy organnyń oblıgatsııalar shyǵarýy jolymen júzege asady. 2017-2021 jyldar aralyǵynda respýblıka boıynsha «Báıterek» UBH AQ-nyń oblıgatsııalary arqyly 805,7 mlrd.teńge bólý josparlanyp otyr. Nesıelik turǵyn úıdiń quny bir sharshy metri -140 myń teńgege deıin bolmaq. Osylaısha, oblys boıynsha 2017-2021 jyldar aralyǵynda shamamen 78,2 mlrd.teńgege nesıelik úıler salynyp, 558,6 myń sharshy metrdi quraıtyn 7146 páter paıdalanýǵa berý josparlanyp otyr.
Ekinshiden, bankterge shartty salymdar salý arqyly júzege asady. «Turǵyn úı qurylys jınaq banki» ekinshi deńgeıli bankterge tómengi paıyzben qarjy berip, ol qarjy turǵyn úı salatyn kompanııalarǵa 7 paıyzben usynylmaq. Bul shara turǵyn úı salý kólemin edáýir arttyrady dep kútilýde.
Tórtinshi baǵyt - halyqtyń áleýmettik álsiz toptary úshin jalǵa beriletin turǵyn úı qurylysy. 2017-2021 jyldar aralyǵynda óńirimizdegi respýblıkalyq bıýdjetten arendalyq turǵyn úıler qurylysyna 159,6 mlrd. teńge qarastyrylǵan.
Atalǵan jyldar aralyǵynda 427,9 myń sharshy metr arendalyq turǵyn úı 6816 páter qurylysyn júrgizý josparlanýda.
Baǵdarlamadaǵy besinshi baǵyty - jeke turǵyn úı qurylysyn damytý. Bul baǵyttyń sheńberinde kóptegen ozyq álemdik qalalardyń úlgisinde biryńǵaı sáýlettik stılde jeke turǵyn úıler salýǵa basymdyq beriledi.
