Ońtústikqazaqstandyqtar Astanada 18 kólikti tonady dep aıyptalýda
ASTANA. QazAqparat - Elordalyq polıtsııa qyzmetkerleri avtomobıl salondaryn tonaǵan urylardy qolǵa túsirdi, dep habarlady qalalyq ІІD baspasóz qyzmetinen.
«Astana qalalyq ІІD jedel basqarý ortalyǵynyń vıdeobaqylaý kameralary arqyly operatorlar saýda úıleriniń biriniń mańynda eki kúdikti azamatty baıqaǵan», - delingen habarlamada.
Jedel izdestirý sharalary barysynda krımınaldyq polıtsııa qyzmetkerleri avtomobıl salonyn tonaǵan 29 jáne 30 jastaǵy OQO turǵyndaryn quryqtady. Belgili bolǵandaı, seziktiler avtodabyldy skanerleý arqyly kólikti ashqan. Keıin ondaǵy aqsha men baǵaly zattardy jymqyrǵan.
Búginde ustalǵandar elordadaǵy 18 kólikti tonady dep aıyptalýda. Olardyń biri buryn urlyq úshin sottalǵan bolyp shyqty. Seziktiler Astana qalalyq ІІD ýaqytsha ustaý ızolıatoryna qamaldy. Olardyń ústinen QR QK 175 baby boıynsha (Urlyq) qylmystyq is qozǵaldy. Seziktilerdiń qala aýmaǵynda jasalǵan ózge qylmystarǵa qatystylyǵy anyqtalýda.
